Shillong, Nailar 19
Ka Mawkriah West ka la lah ban pynliem noh ïa ka Ïatyllilang FC da 4-2 kol ha ka jingïakhun quarter final kaba saw jong ka Third Division Football League 2025 ba la pynïaid da ka Shillong Sports Association (SSA) ha ka sngi Ba-ar ha SSA Stadium kaba ha First Ground, Polo.
Ha kane ka jingïakhun ka Mawkriah West ka la ïoh ban pynkhih jar nyngkong eh ha ka minit kaba 24 lyngba u Shailang Nongspung, hynrei ka la shah pynphai kylla ar kol ha ka Ïatyllilang lyngba u Donboklang Mawkhiew (25) bad u Banskhembok Wanshong (28).
Hashwa ban kut ka jingïalehkai jong ka kylla step ka Mawkriah ka la lah ban pynphai kylla lyngba u Calbessius Pathaw (45) na ka bynta ban ïakhaid mar 2-2 kol.
Hadien katto katne por ba la bteng ïa ka jingïa-khun jong ka kylla miet, ka Mawkriah West ka la ïakhun tyngeh bad ka la ïoh ban thep kol biang lyng -ba u Kerrimore Marba-niang ha ka minit kaba 52 bad ïa ka kol kaba khatduh la thep da u Sevius Kharkrang (71) na ka bynta ban khur syndon ïa ka jingjop bad ban ïoh rung syndon sha ka semi final.
Na ka liang ki bor pynïaid ki la pynbna ba ïa ki jingïakhun semi final yn pynlong ha ka 25 bad 26 tarik mynta u bnai.
Kiwei pat ki kynhun kiba la ïoh rung sha ka semi final ki long ka Madan SCC bad ka Umlyngka. Ha kawei pat ka jingïakhun quarter final dangshen ka Umrynjah ka la khur ïa ka jingjop, hynrei ka Nongumlong ka la ujor (protest) pyrshah ïa uwei u rangïalehkai ka liang pyrshah.
Te kumta ka Umlyng-ka ka lah ban ïakhun pyrshah ïa ka Umrynjah lane ka Nongumlong ha ka sngi final kaba nyngkong ka ban long ha ka 25 tarik, katba ka Madan SCC ïa ka Mawkriah West ha ka semi final kaba ar ha ka 26 tarik. Ïa kine ki jingïalehkai yn sdang ha ka por 2:45 nohphai sngi. Ïa ka jingïakhun final yn pynlong ha ka 30 tarik mynta u bnai.
