Kohima, Nailar:
Hadien ka jingkhlad noh jong u Lat ka Nagaland u La Ganesan, u Lat ka jylla Manipur, u Ajay Kumar Bhalla, u la shah bynshet shuh shuh ban shimti ïa ka kam kum u Lat ka jylla, ong ka jingpynbna, kaba la pynmih da ka ophis jong ka President ha ka sngi Saitjain.
U Lat ka jylla Nagaland, u La Ganesan, u la khlad noh ha Chennai, ha ka sngi Thohdieng. U la don ha ICU ha ka jingshah sumar hadien ba u la kyllon ha ka 8 tarik u Nailar ha ka ïingsah jong u ha ka nongbah bad u la mynsaw na ki bynta jong ka khlieh, la ïathuh ki tyllong khubor.
U Bhalla, u la long Lat ka jylla Manipur, la jan dap 8 bnai eiei. Ka jylla mynta ka don hapoh ka jingsynshar President, ha kaba la buh ïa ka dorbar ha ka jingpynsangeh. Dang shen la mynjur da ka Parliament ban pynjlan ïa ka jingsynshar President ha Manipur da hynriew bnai ha Manipur.
U Bhalla, uba la long mynshwa u Home Secretary jong ka sorkar pdeng, u la shah thung kum u Lat jong ka jylla Manipur ha u bnai Nohprah, 2024. U la long kum u Home Secretary ka sorkar pdeng, ha ka por ba dang jur ka jingïakynad ha ka jylla kaba la sdang ha ka 3 tarik u Jymmang, 2023.
