Shillong, Nailar 19
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor kaba la ïoh na ki pulit la ong ba ha ka 18 tarik mynta u bnai, kata ha ka por kumba 12 baje shiteng synñia, ki runar bym lah ban ithuh, ki la tuh ïa kawei ka taksi kamai kaba don ïa u registration number ML05-AE-3066 kaba la long trai da u Bah Kyrmenlang L Langrin bad ïa kane ka kali kamai, la tuh na Ïewduh, Shillong.
Ha kawei pat ka khubor ka Kong Emica Mylliemngap ka la ai ka jingujor ba ha ka 16 tarik mynta u bnai, ki runar bym lah ban ithuh, ki la tuh ïa ka arshaka ka jong ka, na ka thaiñ Malki, Shillong.
Kumjuh ruh na ka liang jong u Ajamsha Ch Sangma u la ai ka jingujor ba ha ka miet jong ka 16 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AF-0796 na ka thaiñ Umkdait, Shillong.
Ha kawei pat ka khubor, u Bah Iateilang Kharbudnah u la ai ka jingujor ba ha ka miet jong ka 16 tarik mynta u bnai, ki runar bym lah ban ithuh ki la tuh haduh 21 tylli ki sim ba ri (poultry birds) napoh ka Demonstration Farm ka Krishi Vigyan Kendra kaba don ha 5 Mer, Upper Shillong.
