Shillong, Nailar 19
Ka VPP Youth Wing ka la pynpaw ka jingsngewkhia kaba jur halor ka jingkharoi jong ki jingsniew bad ka jingkiew sted ki nongngop ha u drok bad ki jingsniew kiba mih na kane ka jingkyrni ka la buh jingeh ïa ka imlang sahlang baroh kawei.
Bun ki longïing ki la pra phom bad bun ki jingim ki la duh noh khlem pat dei por. Nalor ki jingpang kiba mih na ka jingkyrni bad ki kam tuh kam thok bad kyrshan ïa kane ka jingmlien jong ki, ka la pynjot thiaw ïa bun ki khun samla ka Jylla.
Ka jingjia ha ka 18/8/25 ha kaba kawei ka khynnah skul ka la shah dung da u thyrnia injek ha ki briew bym ithuh katba ka dang ïaid lynti, kaba la pynkyndit bad pynsyier ïa bun ki khun samla bad ki kmie ki kpa.
Ka jingïoh rung u drok ha kane ka Jylla ka long kaba lyngngoh haduh katta katta bad ka seng ka kyntu ïa ki pulit ka Jylla ba kin pynjur ki jing talasi bad ïaid pahara ha kylleng ki jaka.
Ka VPP Youth Wing ka maham tyngeh ïa kine ki jait briew kiba thmu pynjot ïa ka jingim kiba lui lui bad lada lap kan ym aili ïa kine ki jait briew.
“Shen ngin sa shim bad wad ki lad ki lynti kumno ban tehlakam ïa kine ki jingsniew bad jingeh ba ka Ri ka mad,” la pynkut ka kyrwoh khubor ba la pyllait da u Bah Marbud Dkhar, President VPP Youth Wing.
