Shillong, Nailar 19
Ka kynhun ïalehkai Under-17 jong ka 4 For All Football Academy, Shillong ka la wan ba-ar ha ka DPDL Super Cup 2025 kaba la long ha Bengaluru, katba ka jingïaid lynti ki kynhun ïalehkai U-13 bad U-15 ki la kut ha ka semi final.
Ha kane ka lympung ïalehkai kaba la sdang naduh ka 2 tarik bad kut ha ka 13 tarik mynta u bnai, u Teibanjop Nongbri u la ïohpdiang ïa ka nam Best Defender ha ka U-17 bad u Lambormanik Khardewsaw ha ka U-13. U Pailaremdor Syndor u la ïohpdiang ïa ka khusnam Best Coach ha katei ka lympung.
“Kane ka jingjop ka pynpaw ïa ka jingtrei shitom, ka jingaiti, bad ka sap jong ki khynnah ïalehkai jong ngi kiba la mihkhmat ïa ka Jylla jong ngi da ka jingsarong bad jingkut jingmut ha ka rynsan jong ka ri. Ka pyni ïa u mawjam ha ka jingïaid lynti kane ka shlem ai jinghikai jong ngi ha ka ban kyntiew ïa ka jingïalehkai phutbol ïa ki khynnah kiba dangrit na ka bynta ka lawei ka ban wan,” la pynpaw kat kum ka kyrwoh ba la pyllait da kane ka shlem ai jinghikai.
