Jowai, Nailar 20
Ka ïingbishar jong ka P. Syngkon, Special Judge, POCSO ka West Jaiñtia Hills District, Jowai ha ka 18 tarik Nailar 2025, ka la rai pynrem ïa u Heingaid Bareh uba dei na ka shnong Mowbhar (Mowjem) kaba hajan ka shnong Moolaber da kaba set phatok 20 snem namar ka jingdonkti ha kaba leh beijot ïa kawei ka khynnah ha ka jingjia kaba la jia ha u snem 2017.
Ka ïingbishar ka la rai pynrem ïa une u runar hapoh ka kyndon Section 3(a) jong ka POCSO Act kaba lah ban pynshitom katkum ka kyndon 4 jong ka POCSO Act 2012 da kaba daiñ kuna ruh T.30,000.
U Superintendent of Police ka West Jaiñtia Hills, lyngba u kyrwoh u pyntip ba kane ka jingjia ka dei kaba la jia hadien ka jingïoh pdiang ïa ka jingmudui ejahar ha ka 7 tarik Naiwieng, 2017 na u nongujor uba la pynpaw ba ha ka 6 tarik Naiwieng, 2017 ha ka por kumba 2:30 nohphai sngi, ka khun rit jong u kaba dang 11 snem rta ka la shah leh beijot ha u Heingaid Bareh katba ma ka bad ka paralok ki dang leit lum dieng na kawei ka jaka khlaw.
Hadien ka jingpyrta briew une u briew u la phet krad noh na katei ka jaka.
Ïa kane ka case la register hapoh ka thanad Jowai hapoh ka Case No. 192(11)17 U/S 4 POCSO Act bad la tohkit bad charge-sheet da ka WPSI RM Suchiang.
