Jerusalem, Nailar:
Uwei u heh ka Israel ha ka Sngi Ba-ar, u la ong ba ka sorkar jong u ka dang pyrkhat bha halor ka jingtyrwa jong ki ri ka pyrthei ban sangeh thma noh bad ka Hamas bad kumta ka Israel ha kane ka por, ka dawa ia ka Hamas ba ka dei ban pyllait lut noh ia baroh ki briew jong ka Israel lada ka kwah ia ka jingiasuk bad ka Israel.
Namar la ong ba ki nongpyniasuk ki dang ap ia ka jubab ba tikna jong ka Israel halor katei ka jingthmu, kane ka long ruh tang shi sngi hadien ba ka Hamas ka la ai dak ia ka jinglong ba la pynkhreh naka bynta ka jingiakren kaba thymmai kaba thmu ban pynkut noh ia katei ka thma kaba la jan dap ar snem kynthih.
Ka nongpyniasuk, ka Qatar ka la pynpaw ia ka jingkyrmen kaba la buhrieh ia ka jingtyrwa kaba thymmai, da kaba kdew ba ka long kaba iasyriem bad ka jingiakren kaba kham mynshuwa, kaba la mynjur da ka Israel.
Haba kren khlem da kwah ban pynpaw kyrteng, uwei u heh sorkar Israel u la iathuh ha ki lad pathai khubor, ba ka jingdawa na ka liang jong ka sorkar Israel kam shym don kylla bad ka jingdawa jong ka Israel ka long beit tang ban pyllait noh ia baroh ki nongshah rahbor baroh kiba ka Hamas ka la rahbor naduh kaba sdang jong ka thma ha u Risaw jong u snem 2023.
Ka Egypt ka la ong ha ka Sngi Nyngkong ba, ma ka bad ka Qatar, ki la phah ïa ka jingtyrwa ba thymmai sha Israel, da kaba pyniasyriem ia ka bol kaba la don hapdeng madan bad sa tang ba kan rung noh sha ka kol.
U nongaiktien jong ka tnat kam bar ri jong ka Qatar, u Majed al-Ansari, u la ong ha ka Sngi Ba-ar ba ka Hamas ka la long ba la pynkhreh ban iakren iasuk noh. Kumjuh ruh na ka liang ka Israel, u la ong ba ka la pyni ia ka jingiabeit ban iatreilang bad ki ri nongpyniasuk haba iadei bad kane ka bynta, kumba ka la dep mynjur mynshwa ban sangeh iasiat bad ban pdiang ia ki briew jongka kiba la pyllait noh da ka Hamas.
