Shillong, Nailar 20
Ka Balang Katholik ka la duh noh ïa u wei u missionary u ba la trei borbah ban pynphriang ïa ka ktien u Blei ha kylleng sawdong ka rilum Khasi bad Jaiñtia, kata u Fr Francis Kharwanlang u ba la khlad noh ha ka 20 tarik u Nailar 2025 ha Nazareth Hoapital, Shillong.
Ka jingkhlad noh jong u Rev. Fr. Francis Kharwanlang ka long ka jingduh kaba khraw ïa ka Balang baroh kawei.
Ïa u Rev. Fr. Francis Kharwanlang la kha ha ka 27 tarik u Naiwieng (November) 1945 ha ka Shnong Tynrong Sohra bad dei ha ka 18 tarik u Naiwieng (November) 1972 la pynkyntang Lyngdoh ïa u ha Cathedral Parish Shillong.
Kum u Lyngdoh u la trei ha bun tylli ki Parish bad ki Mission ha kylleng sawdong ka Rilum Khasi bad Jaiñtia. Ha u snem 1974-1980 u la don ha Pynursla Parish kum u Parish Priest, 1980-1983 ha Mawkhar Parish kum u Parish priest. Nangta u la leit pule sha Rome, Italy hadien ba u wanphai na Rome u la long kum u Parish Priest ka Marbisu Parish ha u snem 1986-1991, ha Cathedral Parish ha u snem 1991-1998, nangta shi snem u la pynlut ïa ka por ha ka ban thaw jingrwai bad thoh kot bad u la pynmih ruh ïa ki cassette jingrwai.
Ha u snem 1999 -2006 u la long kum u Parish priest jong ka Markasa Parish East Khasi Hills, 2006-2011 ha Mawprem Parish.
U Rev. Fr. Francis Kharwanlang u la long ruh u Spiritual Director jong ka St. Paul’s Seminary, St. Xavier’s Minor Seminary Upper Shillong, St. John’s XXIII, u la bat ruh ha ki kyrdan bapher bapher kum u Director ka Cathechist Cum Teachers Training Marbisu, General Secretary Centenary Celebration of North East India, kum u Chancellor and Notary of the archdiocese, u la long ruh u Chief Editor, nangta Spiritual Director ka Synjuk ki seng Rangbah Khasi Jaiñtia Hills.
Haba ïa kren bad u Auxiliary Bishop ka jylla ñiam bah Shillong u Most Rev. Bernard Laloo u la pyntip halor ka jingkhlad noh jong u Rev. Fr. Francis Kharwanlang ha ka step jong ka 20 tarik u Nailar 2025 ha Nazareth Hospital, Shillong, da kaba ong ba kum u Lyngdoh u la noh synñiang ha bun ki rukom, ha ki bynta ki bapher-bapher.
“Kum u Lyngdoh u la thaw Shibun ki jingrwai kiba haduh mynta ngi dang rwai ha ka kot Lynti Bneng, u dei ruh u wei u ba sdang bad pynphriang ïa ka jing mane Blei ïa ka Divine Mercy ne ka jingduwai jingisynei jingBlei”, la ong u Most Rev. Bernard Laloo.
