Shillong, Nailar 20
Ka Diamond Harbour ka la lah ban pynliem noh ïa ka East Bengal da 2-1 kol ha ka semi-final kaba ar jong ka lympung ïalehkai Durand Cup 2025 ha ka sngi Balang ha Vivekananda Yuba Bharati Krirangan kaba ha Kolkata.
Kane ka nam jop ka la wan urlong lyngba u Jobby Justin bad u Mikel Kortazar, katba u Anwar Ali u la pynphai na ka bynta katei ka kynhun kaba na Kolkata.
Lyngba kane ka jingjop ka Diamond Harbour ka la long ka klob kaba nyngkong eh na ka I-League ban rung phainal ha ka Durand Cup bad kan pynkhreh ban ïakhun pyrshah ïa ka lahduh jong u snem ba la lah, ka NorthEast United ha ka 23 tarik ha Kolkata.
Haba phai sha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step. Dei hadien katto katne por ba la bteng ïa ka jingïakhun jong ka kylla miet ba ka Harbour ka la ïoh ban pynkhih jar nyngkong eh lyngba u Kortazar ha ka minit kaba 66. Tang hadien shi minit ka East Bengal ka lah ban pynïakhaid kylla lyngba u Ali hashwa ba u Justin un thep ïa ka kol kaba ar na ka bynta ban pynlong ïa ka Harbour ban khur syndon ïa ka jingjop.
