Shillong, Nailar 20
Ka Sorkar Meghalaya ka la pynbna ïa ka jingbei tyngka kaba heh bha ha ka kam jngohkai pyrthei, ha kaba ka tnat pynroi jong ka thaiñ shatei lam-mihngi ka Ministry of Development of North Eastern Region (DoNER) ka la pyllait ïa ki projek kiba kot sha ka T.220 klur na ka bynta ban kyntiew ïa ka kam jngohkai pyrthei ha Sohra.
“Ha ka sien kaba nyngkong ka tnat DoNER ka la pyllait ruh ïa ki jingthmu bei tyngka na ka bynta ka kam jngohkai pyrthei.”
Baroh shikatta ïa ki projek baroh la ju bei pisa da ki agency kum ka ADB, NDB hynrei mynta u snem u Myntri ka Sorkar Pdeng ka DoNER, u Jyotiraditya M Scindia u la pyllait haduh T.220 klur tylli ki projek na ka bynta ki projek jngohkai pyrthei ha Sohra,” la ong u Myntri ka tnat jngohkai pyrthei, u Bah Paul Lyngdoh ha ki nongthoh khubor ha ka sngi Balang.
U la pyntip ba u Scindia u lah ban leit sha ka tamasa Cherry Blossom mynta u snem bad buh ïa ki maw nongrim na ka bynta ki katto katne ki projek hapoh bad sawdong ka Sohra haduh T.220 klur.
U Myntri u la pynpaw ba kine ki projek kin pynleit jingmut ha ka kam jngohkai pyrthei kaba la ïoh jingtip, kaba ailad ïa ki nongwan jngohkai ban pynngam ïalade ha ka jingim shnong bad ka kolshor jong ka thaiñ.
U Myntri u la pynbna ruh ïa ka rai jong ka Sorkar na ka bynta ban thaw ïa ka ‘Heritage Resort’ ha ka jaka ‘sericulture’ ha Lawsohtun.
“Ar bnai mynshwa nga la leit jurip ïa ka Textiles Complex jong ngi kaba don ha Lawsohtun kaba don marjan bad ka projek Shillong Ropeway bad ha ka jingdon lang ki ophisar jong baroh ar ki tnat Textile bad ka tnat jngohkai pyrthei, mynta ngi la ïaid shakhmat ban pynbor ban thaw ïa ka Heritage Resort ka ban long kaba rim tam ha ka thaiñ shatei lam-mihngi jong ka Ri India”, u la ong.
Ïa kane ka jaka jngohkai pyrthei yn pynroi ha ka jaka ri dohkha jong ka snem 1925 kaba la sdang da ki phareng, kaba mynta ka dei ka projek pateng.
“Ban pynbha bad kyntiew shuh shuh ïa ka jingïakynduh jong ki nongwan jngohkai sha Meghalaya ngin pynïasoh lang ïa ki kam jong baroh ar ki tnat Textile bad ka tnat jngohkai pyrthei khnang ban pynbiang ruh ïa ka jingkiew jong ki nongwan jngohkai ha kata ka thaiñ, shisien ba la lah ban pyndep ïa ka Shillong Ropeway Project, kyrmen ban lah pyndep ha kine ki ar snem,” bynrap u Myntri.
