Shillong, Nailar 20
U Symbud Myntri Rangbah ka jylla u Bah Prestone Tynsong u la ïakynduh mar khmat ïa u Nongsharai Bahakhliehduh jong ka Balang Katholik, u Kpa Bakhuid u Pope Leo XIV, ha Vatican, ha ka step Sngi Balang, ka 20 tarik u Nailar 2025. U Bah Prestone u la long u ba nyngkong na ka Jylla Meghalaya ban ïakynduh ïa u Pope, tang hadien lai bnai ba la jied ïa u Kardinal Robert Francis Prevost ban long u Khliehduh jong ka Balang Katholik Salonsar bad u Khliehduh jong ka Ri Vatican.
Ha ka por jong ka jingïaphylliew jong ki para marwei, u Pope u la ai ïa ka jingkyrkhu apostolik jong u halor u Bah Prestone bad ki paid nongshong shnong jong ka Jylla baroh kawei. U la phah rah ruh ïa ka jingkhublei ba kyrpang jong u, lyngba jong u Bah Prestone, sha ki briew jong ka Jylla. U la pynshlur bad ai mynsiem bad u pynthikna ïa ka jingkongsan jong ka jingtrei shitom tyngeh ban wanrah ïa ka jingsuk bad ka jingïatylli ha ka jylla. Kane ka jingïalang ka la jia ha ka jingïamir jingmut hapdeng kine ki ar ngut ki riewkhraw shaphang ka jinglong ka jingman jong ka jylla, ha kaba u Symbud Myntri Rangbah u la kyrpad kyrpang ïa ka jingkyrkhu jong u Pope halor ka jylla. U Kpa Bakhuid u la khublei ïaroh ïa ki jingtrei shitom jong ki Nongsaiñ Hima bad ki Nongsharai Mynsiem jong ka jylla ha kaban tem ïa ki jingeh ba har rukom kiba la wan bsuh sop sop hapoh ka jylla.
U Pope Leo XIV u la tyrwa ïa ka jingkyrkhu bad ka jingpynshlur jong u, da kaba ai mynsiem ïa u Symbud Myntri Rangbah, u la kyntu bad ban jur biang ban don ka jingïatreilang hapdeng ki nongïalam jong ka Jylla bad ki nongsharai mynsiem jong ka Balang ha kaban wanrah jingsuk bad jingïatylli ha ka jylla.
U Pope Leo u la ju trei borbah ha ki khep bapher, kynthup ïa ka jingrakhe ïa ka jinglehkmen jong ki Rympei ïing (Jubilee of Families) bad ka jingïakynduh lang bad ki Katholik ba sha mihngi (Eastern Catholics), ha kaba u la ban borabor ïa ka jingkordor jong ka jingsuk bad ka jingïatylli. U la ai jingkren bakyrpang ruh ïa u Khliehduh jong ka Shlem Saiñ Bam bad Rep (Food and Agriculture Organization), da kaba u ban khia ïa ka jingdonkam jong ka jingïatreilang baroh shityllup ka pyrthei ban pynduh ïa ka jingshah thngan bad ban ïoh ïa ka jingbam ba koit ba khiah.
