Imphal, Nailar:
U Lat ka jylla Manipur, u Ajay Kumar Bhalla ha ka sngi Ba-ar, u la pynpaw ba ka sorkar ka dang trei ban sdang ïa ka jingïakren ïasuk hapdeng ki nongïalam bapher bapher bad ki kynhun ban pynphai biang ïa ka jingsuk ha kane ka jylla kaba la shah ktah na ki jingïakynad.
Naduh u bnai Jymmang jong u snem 2023, ki jingïakynad jaitbynriew hapdeng ki jaitbynriew Meitei bad ki jaitbynriew Kuki ki la long ka daw jong ka jingduh noh jong 260 tylli ki mynsiem briew bad pynkynriah jaka ïa ki hajar ngut. Katei ka jylla ka la sah hapoh ka jingsynshar President naduh u bnai Rymphang jong une u snem.
Ha ka jingleit jngoh ïa ka Churachandpur, u Bhalla u la plie ïa kawei ka ïing kaba la shna lypa na ka bynta ki briew ki bym don jaka sah shuh ha New Zalenphai bad u la pynthikna ba ki jingpyntreikam ki dang ïaid shakhmat ban ïarap ïa ki longïing kiba la duh jaka sah ban leit phai noh kham kloi sha la ki ïing ki sem. “Nga kwah ba ka jingsuk kan wanphai biang kloi, bad phi baroh phi dei ban ïohlad ban leit phai noh kloi katba lah shala ki jong ki ïing ki sem. Ka sorkar ka dang trei na ka bynta ka jingïakren ïasuk hapdeng ki nongïalam bad ki jaidbynriew bapher bapher ban pynthikna ba ka jingsuk kan wanphai biang ha ka jylla”, la ong u Bhalla haba kren sha ki paidbah ha ka jingïalang.
U Bhalla u la pynlong ïa ka jingïalang bad ki nongmihkhmat jong ka Kuki-Zo Council (KZC) ha ophis jong u Deputy Commissioner ha Churachandpur, ha kaba la ïakren ïa ki mat kiba ïadei bad ki jingtei, ka pule puthi, bad ka synshar khadar. Ka KZC ka la buh ïa ki jingdawa, kynthup ïa ka jingpynïasoh surok kaba kham bha ha kylleng ki distrik kiba bun ki Kuki, ka jingpynbha ïa ka koit ka khiah ha ka sor Moreh, ka jingpynlait ïa ki jingai jingïarap jong ki samla pule, bad ka jingthaw ïa ka Manipur Service Commission.
Ha kane ka sngi, u Lat u la leit ruh ban jngoh ïa ka Churachandpur distrik bad bishar bniah ïa ki jingthmu pynroi baroh bad ki lad jingïada hapoh ka distrik.
U Lat ha ryngkat ka kurim jong u, ki la leit jngoh ïa ka Pre-Fabricated Resettlement Camp ha Torbung, ha kaba ki la ïakynduh ïa ki briew kiba la shah pynkynriah jaka (IDPs). U la plie ïa ka Crèche Centre bad sam ïa ki lad jingïarap sha ki IDP bad ruh u la ai khublei ïa arngut ki samla pule kiba la pyndep ïa ka NEET-2025 ryngkat bad kiwei pat ki samla pule kiba don burom na katei ka Camp bad u la kitbok kitrwiang ïa ki ba kin jop nangne shakhmat.
Ka Kuki Students’ Organisation bad ki nongsynshar shnong ki la aiti ïa ki dorkhas bad ki la kyrpad ban tei ïa ka Multipurpose Hall ha kane ka thaiñ.
U Lat u la leit jngoh ïa ka ophis treikam jong ka DC bad pynlong ïa ki jingïakren bad ki MLA, ki seng bhalang, bad ki nongïalam jong ki samla pule.
Ka Kuki-Zo Council bad ka Zomi Council ki la aiti ïa ki dorkhas kiba pynpaw ïa ki mat ha kaba ïadei bad ka pule puthi, ka jingpynïasoh, ka jingsynshar, ka jingpynkynriah jaka ïa ki nongphetwir, bad ki lad jingïarap. U Lat u la pynthikna ba yn sa peit bniah ïa ki jingeh jong ki.
Hadien kane, u la bishar bniah ïa ka jinglong jingman jong ka jingshngaiñ ha ka distrik bad ki heh shipai, ka Assam Rifles, bad ki heh jong ki pulit, ha kaba la ïoh ïa ka jingpynshai kaba bniah da u 27 Sector Commander Brig. u S. Prashanth.
Ha ka por janmiet, u Lat u la leit jngoh ïa ka Geljang Resort, ha kaba la pdiang burom ïa u da u rangbah shnong bad la ïoh ruh ïa ka jingshad tynrai jong ki Mizo.
