Imphal, Nailar:
Ha ka sienjam ban pynkhlaiñ ïa ka bor ïada ri lyngba ki kor ki bor kiba thymmai, ka Assam Rifles ka la ïasoi ïa ka jingïateh kular bad ka Indian Institute of Information Technology (IIIT), Manipur, ban kyntiew ïa ka jingpyndonkam ïa ki Drone ha ki kam pahara.
Ïa kane ka jingïateh la pynlong ha ka lah sngi U Blei ha ka jingïalang ha Mantripukhri ha Imphal West district. Ka jingïalang ka kynthup ïa ka jingïasam ïa ki kot ki sla bad ki jingïalang kiba la pynleit jingmut ha ka jingpynlong tynrai ïa ki rukom pyntreikam ïa ka Drone, la ïathuh ki heh sorkar.
Kum shi bynta jong ka jingïatreilang, ka jaka pule ka la pynlong ïa ka ‘Advanced Drone Training and Refresher Course’, ka ban kynthup ïa ki jingtreikam jong ki Drone, ka jingpynbha, bad ka jinghikai ba la pynskhem da ka DGCA.
Ïa kane ka prokram la shna khnang ban kyntiew ïa ka jinglong ba la pynkhreh ban treikam da kaba pyndap ïa ki briew da ki jingtbit ba kham shajrong ha ki kor Unmanned Aerial System.
Katkum ka jingpynbna, kane ka jingthmu ka pynpaw ïa ka bynta ba kongsan jong ka jingïatreilang hapdeng ka tnat ïada ri bad ka tnat pule puthi ha kaba kyntiew ïa ka jingshaniah halade ha ka liang ka teknoloji.
“Kane ka jingïatreilang ka wanrah lang ïa ka jingstad treikam jong ki shipai Assam Rifles bad ka jingstad thymmai jong ka IIIT Manipur, kaba plie lad ïa ka kynhun ïada kaba kham lah ban ïaleh pyrshah bad kaba la pynkhreh na ka bynta ka lawei”, la ong ka kyrwoh khubor.
Ka jingïalang ba la pynlong da ki dkhot jong ka IIIT ka la pynpaw ïa ka jingdonkam jong ka jinglong trai ri kaba ïoh ïa ka jingsynshar hi ha ka liang ka teknoloji ïada ri. Ki heh ophisar ki la kdew ba ki Drone ki nang kylla long ki tiar kiba kongsan na ka bynta ban peitngor, ki jingtreikam ba stad, bad ban ïarap ïa ki jingjia ba sngewsih ha ka thaiñ.
