Shillong, Nailar 20
Ka Sorkar Jylla ka la pynbna ïa ki jingthmu ban ïaid shakhmat bad kajuh ka rukom treikam ne ka ‘Uniform Formula’ na bynta ban pynkynriah ïa ki nongdie madan ha kylleng ki jaka jong ka Jylla.
U Symbud Myntri Rangbah ka Jylla uba dei ruh u Myntri ka tnad kam pynroi sor, Bah Sniawbhalang Dhar ha ka Sngi Balang u la ïathuh ha ki nongthoh khubor ba ïa kajuh ka rukom ba la pyndonkam ha Khyndai-Lad yn sa pyntreikam ruh ha kiwei pat ki jaka, ban pyntikna ïa ka jingïahap ha kaba ïadei bad ka rukom pynkynriah jaka.
“Ngin sa trei katkum kata. Kajuh ka ‘formula’ kan treikam ha baroh ki jaka. Ai ba ka por kan wan, hynrei ngin leh ha ka rukom kaba bha,” u la ong.
Ha Khyndai-Lad, ka Sorkar ka la sdang ban pynkynriah ïa ki nongdie madan khnang ban pynlong ïa ka jaka ïaid kjat bad ban kyntiew ïa ki kam jngohkai pyrthei. La ai ruh sha ki nongdie madan ïa ka bai kynriah kaba T.10,000 bad nalor kane, yn ai sa T.2,000 (ha ka shi bnai) na bynta 5 bnai.
U Bah Dhar u la ban jur ba ka tnad ka dang trei ha la ki kylla ban khmih ïa ka jingeh haba ïadei bad ka jingdie-jingdie ba khlem jingbit ha ki jaka kum ha Laitumkhrah bad kiwei-kiwei ki jaka ba kongsan.
Ka Meghalaya High Court ka la bthah ïa ka Shillong Municipal Board ba kan aiti ïa ka kaiphod halor ka jingdon jong ki laisen die jingdie (Vending License) ba la ai bad ki nongdie madan ki bym don laisen ha ka thaiñ Laitumkhrah.
Haba kylli, u Bah Dhar u la pyntip ba ka Sorkar ka thmu ban pynbeit ïa ka jingeh katkum ka aiñ kumjuh ban pyntikna ba ki nongdie madan kiba dei hok ha Khyndai-Lad kin ïoh pdiang ïa ki Certificate of Vending (CoV).
Katkum ka jingong jong u, ki nongdie madan ba la pynkynriah ki la pynpaw ïa ka jingsngewhun halor ki jingpyrshang ka Sorkar – da kaba kyrpad shuh ïa ki jingdonkam kum ka bording, ka um, bad ki paiñkhana.
“Ngi la pyntikna ïa ki ba yn sa shimkhia ïa ki jingeh jong ki, bad la pyrshang ban kynthup lang ïa baroh ki nongdie madan kiba dei hok,” u la ong.
Shuh shuh u Bah Dhar u la pyntip ba ka Sorkar kan dang bteng ban khmih bniah kumjuh ban pynithuh shuh ïa ki jaka ha ki bynta bapher-bapher ban pynbha pat ïa ki nongdie madan.
