Shillong, Nailar 20
Ka Synjuk ki Nongdie Jaiñ ha Khasi Market ha ka 20 tarik u Nailar 2025 ki la leit ban ïakynduh ïa u Chief Executive Officer (CEO) ka Shillong Municipal Board (SMB) halor ka jingslem ban pyndep ïa ka jingtei ha jaka ïeng kali taxi Jaïaw kaba don ha Motphran.
Haba kren sha ki lad pathai khubor ka Kong Larisuk Rani Secretary ka Synjuk ka la ong ba ka Shillong Municipal Board (SMB) ha ka por ba ki pynkynriah ïa ki na Khasi Market kaba don ha jaka ïeng kali Jaïaw,Motphran ki la kular ban pyndep noh hapoh 10 bnai hynrei mynta la dap 2 snem ruh ki khlem pat dep shna.
Ka jingpynkynriah ïa kitei ki longkmie ba ju shongdie jaiñ ha Khasi Market kadei naduh u snem 2023 bad mynta u snem 2025 ka la dap 2 snem thik.
“Ngi jynjar mynta hadien ba la shah pynkynriah na Khasi Market kaba don ha Motphran sha ka jaka ïeng kali Ri Bhoi bad ki briew kim shym la wan shuh ha katei ka jaka namar ka la jngai palat bad ka kamai kajih jong ngi ruh ka la ktah shibun. Ym shuh ha ka por ba ngi dang shong ha Motphran ka kamai ka dang ïaid bha” la bynrap ka Kong Larisuk Rani.
Ka la ïathuh ruh da kaba ong, “Ngi la ïa soi ïa ka soskular ba hapoh ka 10 bnai kin sa pyndep noh ïa katei ka jingtei kaba dang shna ha jaka ïeng taxi Jaïaw hynrei katta ngi lah ap la 2 snem kynthih ka jingtei kam shym pat dep bad kam pat poi shaei shaei ruh.”
Shuh shuh ka la ong ba ka jaka ba ki shong die jaiñ jong ki mynta ha jaka ïeng kali Ri Bhoi kaba don ha Garikhana kam long kaba shngaiñ bad tang ha ka por 6 baje ki hap ban khang noh ïa ki dukan hynrei mynshwa pat ha ka por ba ki shong ha Motphran haduh ka por 8 bad 9 baje ruh ki dang shong.
Haba bynrap pat na ka liang ka Kong Sheba Nongbet President ka Synjuk ka la ong ba na ka liang u CEO ka SMB u la kular ban phah ïa u kontraktor ba peit ïa katei ka jingtei ba un pyndep noh ha u bnai Kyllalyngkot (January) 2026. Da kaba pynpaw ruh ba ki la hun hadien ba ki la ïoh ban ïakynduh markhmat ïa u CEO.
Kumta ki la kyrpad ïa u CEO ba un sngewbha ban bthah noh ïa u kontraktor ba dei peit ïa katei ka jingtei ba un leh kham kloi ban pyndep noh khnang ba kin ïoh ban leit shong biang ha kajuh ka jaka kaba lah ban pyndap pynbiang ïa ka kamai kajih jong ki.
