Shillong, Nailar 20
U MDC ka Laban-Mawprem Konstitwensi Bah Ricky Shullai ha ka sngi Balang u la kyntu ïa u Myntri ka tnat Tourism Bah Paul Lyngdoh ban leit ban jurip bad baroh ki kynhun ba donbynta kynthup ïa ki Dorbar Shnong ïa ka Shillong Peak Ropeway Project hadien ba mih ka jingkynnoh pynkhyllem ïa ki dieng hajan ki ‘Catchment Area’ ka ban buh pat ha ka jingma ïa ka tyllong um ha katei ka thaiñ.
“Watla kane ka projek kala ïoh ïa ka jingkyrshan na ki nongshong shnong, hynrei dang shen ka jingpynkhyllem ïa ki dieng hajan ka ‘Catchment Area’ kaba kongsan bha, kala pynmih ïa ka jingsngewkhia shaphang ka jingpynneh pynsah ïa ka tyllong um bad ka jingshah ktah ka mariang,” la ong u Bah Ricky Shullai haba kren sha ki lad pathai khubor.
U la kdew ruh ïa ka hukum kaba la pynmih dang shen da ka ïingbishar Meghalaya High Court kaba la thung ïa u Special Officer ban khmih ia katei ka jaka, ha kaba ïadei bad ka PIL kaba la mudui da u Bah Geraldine G Shabong.
“Nga la kyrpad ïa u Myntri ban pynlong ïa ka jingjurip lang bad baroh ki kynhun ba donbynta kynthup ïa ki Durbar Shnong, nongïalam shnong bad ka tnat jngohkai, khnang ba kane ka projek kan lah ban ïaid ha ka lynti kaba khuid ba suba bad da kaba buh hakhmat ïa ka roi ka par bad ka jingïada ïa ka mariang,” u la ong.
U Bah Ricky u la ban jur ïa ka jingdonkam ban pyndonbynta lang ïa ka shnong ka thaw ha ka jingpynïaid shakhmat ïa kane ka projek ban pynthikna ba kan ai jingmyntoi ïa ki samla ka thaiñ bad ban kyntiew ia ka kam jngohkai da kaba burom lang ïa ka jingsngewkhia ka shnong ka thaw.
Ha kane ka jingïakynduh, u la aiti ruh ïa ka dorkhas ha u Myntri uba khmih ruh ïa ka tnat Texitiles ha kaba u la kyrpad ban ai jaka ban buh ïa ka Fire Service Station ha Mulberry Seed Production Centre, Lawsohtun.
Kane ka jingbuh ïa ka Fire Station kala sahteng namar ba kala mih ka jingïakajia na ka jingïakam trai ïa ka jaka ha Maxwellton, Kench’s Trace.
U Bah Ricky u la ban jur ïa ka jingdonkam kyrkieh ban don ïa ka Fire Station, da kaba pynpaw ïa ka jingsngewkhia halor ka jingshngaiñ bad ka jingduna ha kaban leit ai jingïarap kyrkieh ha ka thaiñ Raid Laban.
