Shillong, Nailar 20
Ka kynhun ki ‘thei ïalehkai ka Jylla ka la mad ïa ka jingshah rem ha ka Mizoram da 0-2 kol ha kaba sdang ïa ka Sub-Junior Girls’ National Football Championship (Tier 1) 2025-26 ha ka sngi Balang ha Jorhat, Assam.
Kane ka kynhun ïalehkai ka Jylla ka la shah thep kol tang mar ïasdang ka jingïalehkai kata ha ka minit kaba 2 lyngba ka R. Zonunsiami bad kawei pat ha ka minit kaba 44 lyngba ka P. Seipaw.
Ha kane ka lympung ïalehkai ka Meghalaya kaba la don ha ka Group-A, ka la shah kynthup lang ryngkat ka Jharkhand, Mizoram bad ka Gujarat. Te kumta kane ka kynhun kan pynkhreh ïa ka jingïakhun ka ban wan pyrshah ïa ka Gujarat ha ka sngi Thohdieng ha ka por 8:30 mynstep bad kaba khatduh kan long pyrshah ïa ka Jharkhand ha ka sngi U Blei.
Ha kane ka lympung ki la don 16 tylli ki kynhun ha kaba la phiah ïa ki ha ki saw tylli ki ‘group’. Ki kynhun ki ban wan ha ka kyrdan ba hakhlieh ha kawei pa kawei ka group kin ïoh rung sha ka semi final ïa kaba la buh ban pynlong ha ka 28 tarik bad ka final ha ka 30 tarik mynta u bnai.
Ki kyrteng ki ‘thei ïalehkai ka Jylla ki long ka Ñiewkor Suna, Rikordor Kharshiing, Albela Ïangjuh, Anisha Nongsiej, Idamon Syiemlieh, Jessica Thongni, Jessica Marthong, Marley Lhingchamkim, Maya Adella Mawlieh, Venecle Kharmusalman, Ibakordorshisha Shylla, Phibanda Mary Nongrum, Imandalin Hoojon, Dakheiñkor Kharkongor, Narisha Khyriem, Saralang Lapang, Agielity Marngar, Philarisa Nongphud, Ibankerlin Kharkongor bad ka Arianna Verma.
