Shillong, Nailar 20
Hadien kumba katto kattne sngi ba ka Khasi Student Union (KSU) Laban Circle ka la leit ban pynpra ïa ki jingtei ba long beaiñ ha Mahadev Khola bad ki dkhot ka seng ki la lap ruh ïa ki briew kiba sah beaiñ ha katei ka jaka, na ka liang ka Kong Rosetta Mary Kurbah Deputy Commi-ssioner ka East Khasi Hills District (EKHD) ha ka 20 tarik Nailar 2025 ka la khot ïa ka jingïalang ban ïakren halor kane ka kam.
Ha kane ka jingïalang ka Deputy Commissioner ka la khot ïa ki nongïalam ka KSU Laban Circle, u Superintendent of Police (SP) ka EKHD, Deputy Commissioner ka Labour, Secretary ka Khasi Hills Autonomous District Council, President /Secre-tary Mahadev Khola bad ka Dorbar Shnong Law-sohtun, kaba la pynlong ha DC ophis.
Haba kren sha ki lad pathai khubor u samla Reuben Najiar President KSU Laban Circle u la ong ba katkum ka dulir ba la aiti ïa katei ka jaka, kadei beit tang ban tei ïa ka Mandir ym pat ba kan long ka nongkynti jong ki Pandit ne jongno jongno ruh.
U la ong ba ha kane ka jingïakren, ka seng ka sngew lyngngoh namar ba baroh shi katta katei ka jaka kadei hapoh ka jingpeit jingkhmih ka tnad forest, Upper Shillong hynrei mynta pat ka thet kti ba kam dei kaba hap hapoh ka jingpeit jingkhmih jong ka tnad forest.
“Katkum ka jingïathuh u Pandit, ki don kumba 64 ngut kiba sah ha katei ka jaka bad ban kam ruh ba kine ki dei ki khun ki kti jong ki Pandit ba la sah naduh mynshwa. Katei ka jaka kam dei ka nongkynti jongno jongno ruh bad kim lah ban sah ha katei ka jaka” la ong u samla Reuben Najiar.
U la ong ruh ba ha kane ka jingïakren la rai ba kat haduh bym pat pynbeit ïa kane ka mat, ym bit shuh ban dang shna ïa ki jingtei ha katei ka jaka.
U samla Reuben u la ïathuh ba ka seng ka lap ba ka don ka jingbei tyngka jong ki heh ophisar kiba dei na kiwei pat ki jaidbynriew ban ïoh shna ïing ha katei ka jaka hynrei na ka liang ka seng kam pat ïoh ïa ki kot kiba lah ban pynshisha halor kata.
“Na ka liang ka Deputy Commissioner ka la ong ba kan hap phah shwa ïa ki rai ba la ïakren mynta ka sngi sha ka Sorkar”, la bynrap u samla Reuben.
