Finland, Nailar:
Katkum ki khubor, la ong ba utei u Myntri thaw aiñ jong ka ri Finland, u la pynkut jubor hi noh ia la ka jingim hapoh ka iing dorbar thaw aiñ jong ka Helsinki ha ka Sngi Ba-ar.
U Eemeli Peltonen, u la don 30 snem ka rta bad u long u dkhot jong ka iing dorbar thaw aiñ ka Finland, na ka seng Social Democratic Party.
Ka ophis jong ka ïingdorbar, haba pynthikna ïa ka jingkhlad noh jong u MP ba nyngkong eh na Uusimaa, ka la ong “U briew uba la khlad noh ha Parliament Building ha ka step jong ka 19 tarik u Nailar, u dei u Eemeli Peltonen, u dkhot jong ka Ïingdorbar ha ka samoi treikam ba nyngkong jong u.”
U Peltonen u la khlad noh ha ka por 11 baje mynstep, ong ki pulit jong ka Helsinki, da kaba bynrap ba kim don jingsuba eiei ha kane ka por bad ïa kane ka kam yn dang hap ban tohkit bniah bha namar ym shym la lap daw eiei na ka liang ka iing dorbar thaw aiñ haba iadei bad ka jingpynkut jubor jong u ia la ka jingim ha katei ka sngi.
Watla katta, la ong ba ki pulit ki la ialeh ban pyntip mar-mar sha ki jaka sumar ba kyrkieh, ha kaba ki kynhun pynlait im ki la leit poi khlem da shim por sha katei ka jaka ban ioh ban pyllait im ia u lada dang don ka lad, hynrei ka long kaba sngewsih ba ym shym la lah shuh ban pyllait im ia u namar ki leit lap hadien ynda ka lad ban pynim ia u ka la kut.
Kham hashwa jong u bnai Jylliew, u Peltonen u la pynpaw ha ka Facebook ba u dang shah sumar na ka jingpang shadem ha ki tor, namar kata u la shongthait shwa shipor na ki kam jong u hapoh ka iingdorbar thaw aiñ ha ki taiew ba khatduh jong ka dorbar pyr-em bad u la shim shuti pang ha ka por Lyiur.
Ha ka jingïalang bad ki nongthoh khubor ha Kajaani, u Myntri Rangbahduh jong ka Finland, u Petteri Orpo u la ong ba “ka jingkhlad noh jong u Eemeli Peltonen ka dei ka khubor kaba sngewsih haduh katta.”
U Chairman jong ka kynhun nongsynshar paidbah, u Tytti Tuppurainen, u la ong ba u Peltonen u dei u dkhot ba ieid bad uba ioh jingkyrshan bha ha ka imlang- sahlang jong ngi bad ka long ka jingsngewsih kaba khraw ban duh noh ia u khlem da poi pyrkhat.
