Shillong, Nailar 20
Ka Sorkar Jylla kala rai ban pynsted noh ïa ka kam kaba ïadei bad ka jingshim jaka na ka bynta ka project ban pynheh ïa ka kad liengsuiñ Shillong Airport kaba don ha Umroi.
Haba kren sha ki lad pathai khubor ha ka sngi Balang, u Symbud Myntri Rangbah ka jylla ba khmih ïa ka tnat Transport Bah Sniawbhalang Dhar u la kular ba kan ym don ka jingpynslem na ka liang ka Sorkar, haba pynpaw ba ka tnat bad ki ophisar kila trei shitom ban pyndep noh ïa ka kam shim jaka.
Ka Sorkar kala dep ban mynjur ïa ka jingtyrwa ban thied haduh 11.75 akar ka jaka na ka bynta ban pynheh ïa ka project, kaba ka jingsiew bai lutksan ka long T.72.17 klur sha ki trai jaka.
Ka Airport Authority of India (AAI) ka donkam haduh 22 akar ka jaka ban pynheh ïa kane ka kad liengsuiñ bad ka tnat ïada ri kala mynjur ban ai 10.3 akar da ka jingïateh leave-and-licence.
U Bah Sniawbhalang u la pyntip ba katba ïa ka tender ban pynheh ïa ka kad liengsuiñ la dep ban pyllait bad plie, ka kam ka dei ka ban dang aiti.”Ka Sorkar kan pyrshang ban pyndep noh ïa ka kam shim jaka,” u la ong.
Kane ka jingpynheh ïa ka project ka long ban pynjrong ïa ka runway na ka 1829 meter sha ka 2400 meter, ka ban pynlah pat ïa ki liengsuiñ ba heh kum ka Airbus ba kin hiar, ka ban nang pynkhlain ruh ïa ki lad pynïasoh sha ki nongbah jong ki Jylla ka Ri.
Ha ka 13 tarik Nailar, ka ïingbishar Meghalaya High Court kala pynrem ïa ka jingïaid slem ka project pynheh ïa ka Shillong Airport bad bthah ïa ki bor ka Sorkar Jylla bad Sorkar Pdeng ba kin pynsted noh ïa ki kam khnang ban pyntikna ba yn lah pyndep noh kham kloi katba lah.
