Shillong, Nailar 20
Ka kynhun ki ‘thei ïalehkai U-17 jong ka India ka la pynpaw ïa ka jingtbit ha kaba sdang ïa ka SAFF U-17 Women’s Championship 2025, hadien ba ka la pynjem khnap ïa ka Nepal da 7-0 kol ha ka sngi Balang ha Changlimithang Stadium kaba ha Thimphu.
Kane ka nam jop ka la wan urlong lyngba ki ar kol ba la thep da ka Nira Chanu Longjam (25′ & 56′), Abhista Basnett (16′ & 41′), bad ka Anushka Kumari (37′ & 62′), lem bad kawei pat na ka kapten ka Julan Nongmaithem (45+1′).
Ha kane ka jingïakhun, ar ngut ki ‘thei ïalehkai ka Jylla ki la ïoh ban mih, ha kaba ka Alisha Lyngdoh ka la ïoh ban ïalehkai naduh kaba sdang, katba ka Bonifilia Shullai ka la ïoh ban mih madan ha ka kylla miet.
Ha kane ka jingïalehkai ka India ka la lah ban ïalehkai bha naduh kaba sdang ha kaba ka la tam haduh 5-0 kol ha ka kylla step bad ïa kiba sah ka la pynbud ha ka kylla miet.
Ha kaba nyngkong ka Nepal kam shym la ailad ïa ka India ban ïoh thep kol, hynrei kane kam shym la khanglad ïa ka India ban jam shaphrang ha ka rukom ïalehkai namar kane ka kynhun ka la sdang ïa ka jingkilanmet naduh u Kyllalyngkot mynta u snem.
Ka India ka la ïoh ban pynkhih jar nyngkong ha ka minit kaba 16 lyngba ka Basnett hadien ba ka Longjam ka la pynbud ïa ka kol kaba ar ha ka minit kaba 25.
Hadien shiteng kynta ka India ka la thep biang ïa ka kol kaba lai lyngba ka Kumari (37). Kumjuh ka Basnett ka la pynbud biang ïa ka kol kaba ar hashwa ba ka Nongmaithem kan thep ha ka minit kab 45+1 na ka bynta ban pynlong ïa ka India ban tam 5-0 kol.
Hadien ba la bteng ïa ka jingïakhun jong ka kylla miet, ki ‘thei ka Nepal ki la pyrshang ban ïakhun tyngeh, hynrei tang hadien katto katne por ka la thep kylla sa ar kol lyngba ka Longjam ha ka minit kaba 56 bad kawei pat da ka Kumari (62) na ka bynta ban pynlong shi syndon ïa ka India ban khur ïa ka jingjop.
