Shillong, Nailar 20
Ka University of Science and Technology Meghalaya (USTM) lyngba ka Regional Institute of Nursing Education (RINE) ha ka 20 tarik u Nailar 2025 ka la sdang ïa ka prokram pynrung kyrteng kaba saw sngi na ka bynta ki samla pule ba nyngkong jong ka, ba la pynlong ha 9th Mile, Khanapara , Ri Bhoi.
Ïa ka sngi sdang jong ka jinghikai la pynlong ha ka jingdon ryngkat ka Dr. Unmona Bargohain, Principal jong ka AIIMS bad ka Kong Ivory Kharduit kaba dei ka Deputy Director ka tnad Nursing ka sorkar Meghalaya, kiba long ruh kum ki Kongsan.
Ha ka jingïalang la sakhi ba kaba kham kongsan eh kadei da ka jingdon lang jong u Sarbeswar Sahariya, Pro Vice-Chancellor, USTM uba ïoh ia ka khusnam Padma Shri.
Haba ai jingkren ha kane ka prokram na ka liang u Sarbeswar u la ai mynsiem ïa ki samla pule ban pynneh pynsah ïa ki kyrdan ba ha khlieh duh jong ka jingshakri bad ka jinglong briew ha ka kam sumar.
Ha kane ka sngi la donlang ruh Dr.Abhinanda Das, Principal jong ka PIMC, ha kaba la sam ïa ki jingshemphang shaphang ka jingïatreilang hapdeng ki tnad pule ha ka koit ka khiah bad pynshlur ïa ki samla pule.
Ki jingkren ba jylliew jong ki, ki buh ïa ka sur kaba ai mynsiem ïa ki nongsumar kiba dang sdang. Ki riew shemphang ki la pynpaw ïa ki jinglong jong ka jingaiti, ka jingsngewrit, bad ka jinglong ba tbit ha ka koit ka khiah.
Kumjuh ruh ha kane ka prokram la ïadonlang ki samla pule, ki nonghikai ha ka liang ka koit ka khiah, ki riewshemphang ba kynthup Dr. Kalpana Hazarika, Principal jong ka RINE, Dr. Pooja Chaudhuri, Dr. Mitali Goswami, Dr. Geeta Das, Principal bad Dr. Shyam Sundar Sarma, Assistant Professor, nalor kiwei kiwei de.
Ki samla pule ki la ïoh jinghikai shaphang ka jingïadei bad ka jingpyndonkam ïa kiwei pat ki rukom sumar ha ka rukom sumar jong kane ka juk ba mynta.
U Dr. Baby Dutta u la ïalam ïa ka jingïalang halor ki lad kamai ha ka kam sumar, da kaba pynpaw ïa ka jingdonkam jong ka akor ha ka kam, ka jingbteng ban pule bad ka jingaiti ha ka jingsumar ïa ki nongpang.
