Nongpoh, Nailar 20
Ki pulit jong ka Ri Bhoi District lyngba ka thanad Nongpoh ha ka miet jong ka sngi Ba-ar bad ha ka sngi Balang ki la ïoh ban kem noh ïa san ngut ki samla kiba dei ki nongïalam bad dkhot jong ka Hynñiewtrep National Youth Move-ment (HNYM) halor ka jingkynnoh donkti ban lute pisa na ki kali kamai tourist ha ka surok bah National Highway 6.
Katkum ka khubor ba la ïoh lum, la ïathuh ba kitei ki san ngut kiba shah kem ki kynthup ïa u Sparly Syngkli, Chair-man jong ka Anti Influx Cell ka HNYM, u Donboklang Kharbani President ka HNYM Nongpoh Circle lem bad lai ngut ki dkhot ba kynthup ïa u Aiborlang Marbaniang, u Krius Pariong bad u Ricky Tangsang.
Ka jingkem jong ki bor pulit ïa kitei ki san ngut ki nongïalam bad dkhot ka HNYM ka dei halor ka jingujor ejahar jong ki ar ngut ki nongñiah kali kamai tourist ka jylla ha thanad Nongpoh, kiba la kynnoh ba katei ka kynhun jong ki nongïalam bad dkhot ka HNYM ki la dawa pisa na ki kumba T.3000/- haduh T.6500/- bad la siew ruh ïa ki lyngba ka Google Pay.
Hadien ba la ïoh kem ïa ki, na ka liang ki pulit ki la ïalam noh ïa kitei ki san ngut hakhmat ka ïingbishar jong ka District ha Nongpoh ha ka nohphai sngi bad ka jingtohkit ban lapdien shuh shuh ïa ki kam lute jong kitei ki nongïalam bad dkhot ka HNYM ka dang ïaid shakhmat.
