Mawkyrwat, Nailar 20
Ka KSU South West Khasi Hills District ha ka 20 tarik u Nailar 2025 ka la pynlong ïa ka jingïalang paidbah ha ka shnong Photkroh, Ranikor Civil Sub Division kum shibynta ban pyrshah ïa ka jingthmu jong u Syiem lem bad katto katne ki dkhot ka Executive Dorbar Hima Maharam ban ai jaka sha ki shipai kumba 70 akar na ka bynta ban shna ïa ka Unit Headquarter jong ki BSF ha ki jaka rep ha Photmula, South West Khasi Hills District.
Ha kane ka sngi la wan ban ïa snohkti lang da ki spah ngut ki paidbah ha ka jingïadonlang ki nongïalam na ki seng bapher bapher ka district naduh ka SSSS, HANM, HITO, HNYF bad kiwei kiwei bad la wan ban kyrshan ïa ka KSU da ki nongïalam ka Seng Samla Kur Syiemlieh Sawkpoh, ka Ranikor Area Farmers Association, ka Synjuk ki khun ki Hajar ka Hima Maharam Dong Border, ki Myntri shnong bad kiwei kiwei.
Haba ai jingkren, u Samla Forwardman Nongrem, President KSU South West Khasi Hills District u la pynrem jur ïa ka jinglong mutlop bad leh donbor jong u Syiem Maharam lem bad katto katne ki Myntri Hima, bad ong ba ka seng ka la aipor shitaïew ïa u Syiem ban lum ïa ka Dorbar Hima bad ban weng noh ïa ka rai ban ai jaka ïa ki BSF lym kumta u la ong ba ki paidbah bad ki khun ki hajar ka Hima Maharam kin sa leh ïa kaba donkam.
Shuh shuh u samla Forwardman u la ther tyngeh ruh ïa u Pa’iem Niandro Syiemiong ba kumno u Syiem u ong ba ym don jaka ban rep ban riang ne ban sah ki khun ki hajar katba u don pat ban leit ai ïa ki shipai haduh 70 akar.
U la kynthoh ruh da kaba ong ba mynshwa ki Syiem ki ïaleh ban pynïar ïa u pud u sam Hima hynrei une u Syiem ba mynta pat u ïaleh ban die duh ïa ki jaka na ka bynta ka spah ka phew ba shipor.
U la ong ruh ba ka KSU kam pdiang ïa ka jingpynthame u Syiem da kaba ong ba kane ka dei na ka bynta ka ïohkam ïohjam ïa ki khun samla bad ban siew bai lutksan ïa ki nongrep da kaba buh jingkylli ruh ba hato ju don ki nongtrei Khasi ha ki jaka shipai kum ha Upper Shillong, Mawshbuit bad wat ha Gumaghat Border Out Post ruh.
Ka jingong u Syiem ban siew bai lutksan, ka dei tang ka kam kai namar yn nym lah ban ïapeiñ ïa ka pisa ba shipor bad ka lawei jong ki Khasi Khara bad ki khun ki hajar ka Hima Maharam, u la ong.
U samla Forwardman u la pynrem ruh ba ka jingkyllaiñ jong u Syiem lem bad ki katto katne ki dkhot ka Executive Dorbar Hima ka la paw shai ba watla ki la tyrwa 2 ne 3 tylli ki jaka sha ki shipai phewse kim long shai ne ïathuh haei kita ki jaka kaba pyni ba kane ka dei ka buit sop-sop sha lyndet jong u Syiem bad katto katne ki dkhot ka Executive Dorbar Hima.
Une u nongïalam ka KSU u la ong, “Ka jingdon ka ophis treikam u Syiem ha Photkroh, ngi dang pyrkhat ka dei na ka bynta ka jingshngaiñ ïa ki khun ki hajar bad ka Hima ne kan dei kata ka jaka ban sngap ïa ka jingud jingnam ki Khasi ba shong ba sah ha Maharam, phewse kaba paw mynta i kumba ka dei ka karkhana shna pisa jong u Syiem bad ki katto katne ki ñiangkohnguh kiba dei ki nongbud jong u.”
Kane ka jingïalang ha Photkroh ka dang dei tang ka jingsdang bad lada u Syiem bad ki briew jong u ki leh bym patiaw, ai ki paidbah bad ki khun ki hajar ka Hima Maharam kin shim ïa ki rai bad ki sienjam ba tyngeh nangne shakhmat, u la bynrap.
