Shillong, Nailar 20
Ka Sawmer SC ka la wanphai da ka jingjop ha ka Shillong Premier League 2025, hadien ba ka la lah ban pynliem noh ïa ka Nongrim Hills SC da 4-2 ha ka sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Khaiñkupar Ïawphniaw (80′ & 85′) uba la wan mih madan na kaba shongben (substitute) u la ïoh thep ïa ki artylli ki kol, kaba hashwa jong kane, u Diego Khyriem (36′), Khrawkupar Tamu (51) ki la lah ban lamkhmat ïa ka Sawmer SC, ïa kaba ka Nongrim Hills SC pat ka la lah ba kan tan shwa shipor sha ka jingïakhaid, ha kaba ka kol ba nyngkong ba ka la ïoh ban pynphai kadei lyngba u Bankitboklang Nongrum (43′) bad bynrap sa u Banpynkmenlang Kharsati (76′).
Pynban u Khaiñkupar, mar sien wan mih madan tang hapoh shiphew minit u la ïoh ban thep ïa kine ki artylli ki kol, ban pyntikna ïa ka kynhun ïalehkai ka Sawmer ban khur ïa ka jingjop.
Lah ban kdew ka Sawmer ha ka jingïalehkai kaba nyngkong ka la mad ïa ka jingshah rem ha ka Mawlai SC da 6-2 kol, katba ka Nongrim Hills ka la shah rem ha ka Nangkiew Irat SC da 3-1 kol.
Haba phai sha kane ka jingïakhun, ka Sawmer ka la kham ïoh bun bha ki kabu ksiar, hynrei ka la bam por ïa ka haduh shiteng kynta ba kan lah ban tam shakhmat lyngba ka kol ba la thep da u Diego, uba dei ruh u snar thep kol ba kynsai na ka bynta ka kynhun ha ka samoi ïalehkai kaba la lah.
Haba shim kyllum kane ka jingïakhun ka long kaba kham shongshit bha, katno tam lei-lei hadien ka jingmih madan ka jong u Khaiñkupar, kaba shiphang u la lah ban pynklumar hi thlim ïa ki rangïalehkai ‘dien jong ka Nongrim Hills tad haduh ba un da ïoh ïa ka kabu ksiar ban thep ïa ki artylli ki kol.
Da kane ka jingjop, ka Sawmer ka la kiew kham shalor ha ka miej ïakheiñ point haba ïa nujor bad ka Nongrim Hills kaba dang ïai sah shatrai duh.
Ha ka sngi Palei ka jingïakhun kan long hadpeng ka Mawlai SC pyrshah ïa ka Nangkiew Irat SC ha ka por 4:30 nohphai sngi.
