Shillong, Nailar 20
Ka kynhun ki ‘thei ïalehkai Under-17 ka Nongjri Presbyterian Secondary School ka la pynliem ïa ka International School Sports Organisation (ISSO) da 5-0 kol ha ka jingïalehkai kaba nyngkong ha ka International Subroto Mukherjee Football Cup 2025 ha ka sngi Balang ha nongbah Delhi.
Ka Daphi Syngkli ka la khur ïa ka hat-trick da kaba thep lai kol, katba ïa ki shi kol la thep da ka Rimika Khongkai bad Baiaiteilut Mangu na ka bynta ban pynlong ïa ka Nongjri ban khur ïa ki lai point ha ka Pool-D.
Kat kum ka kyrwoh la ong ba ha kane ka jingïalehkai kaba nyngkong, ki thei ïalehkai ka Nongjri ki la lah ban ïalehkai bha naduh kaba sdang ha kaba ki la ïoh ïa ki kabu kiba biang bad ruh kim shym la ailad ïa ka liang pyrshah ban pynphai kat haduh ba kin da lah ban khur syndon ïa ka jingjop.
Kane ka kynhun kaba na Ri Bhoi District kan pynkhreh ïa ka jingïakhun kaba ar pyrshah ïa ka Chandigarh ha ka sngi Palei ha ka por 6:15 mynstep.
