Moscow, Nailar:
Katkum ki khubor, la ong ba ka Russia kan dang iai bteng ban pynbiang ia ka umphniang sha ka India, ha kaba, ka la pynhiar dor sa kumba 5% na ka dor kaba ka ju khaïi sha ka India baroh shi katta. Hynrei kane ka jingpynhap jong ka Russia ia ka dor umphniang ban khaïi sha India, ka long hadien ba ka United States ka la buh khajna haduh 50% ia ki mar khaïi jong ka India kiba shalan shabar ri.
U nongmihkhmat ba iadei bad ka khaïi pateng jong ka Russia sha India, u Evgeniy Griva u la ong ba, “Kan don ka jingpynhiar dor kaba 5% katkum ka jingiakren ha ka jingialang jong ki tnat ba dei khmih ia ka khaïi- pateng jong ka Russia, ha ka jingpynpoi ia ka umphniang khleh jong ka Russia sha India”.
Ha katei ka sngi, la ïadon lang bad u, da u Deputy Chief jong ka Russia, u Roman Babushkin, uba la ong ba watla ka dei ka “jinglong jingman kaba tynjuh” naka bynta ka India, hynrei “ngi don ka jingshaniah ha ka jingiadei jong ngi”. U la ong ruh, “Ngi ngeit skhem ba ka jingiatreilang ha ka liang ka bor ding hapdeng ka India bad ka Russia kan dang iai bteng wat hapdeng ka jingpynbor jong kiwei pat ki bor ba nabar.”
Katba ka US ka la kynnoh ba ka India ka la bei pisa ia ka thma ha Ukraine da kaba thied ia ka umphniang na Russia bad ka la buh ia ka khajna kaba 50% ia ka India namar ba ka thied ia ka umphniang jong ka Russia.
Ka India ka la pynrem jur ïa ka jingleh “bym hok, bym don nongrim bad bym don jingmut” jong ka US, kaba lah ban ktah jur ïa ki mar khaïi jongka, kum ki jaiñ bad kiwei kiwei.
U Myntri- Rangbaduh ka India, u Narendra Modi, kham hashwa, u la ong ba ka New Delhi kan nym kynran dien ha ka jingeh ha ka liang ka ioh- ka kot.
Ha ka Sngi Balang, ka Karoline Leavitt ka la ong ba u President jong ka America u Donald Trump u la buh da ki khajna ia ka India ban khanglad ia ka Russia ban iai bteng ia ka thma hapoh Ukraine.
Ka Leavitt, ha ka jingïakren bad ki nongthoh khubor, ka la ong ba ka jingthmu ha lyndet jong ki jingpynjari khajna jong ka US pyrshah ia ki mar khaïi jong ka India, ka long ban buh jingeh ia ka ri kaba iadei kam bad ka India, ka Russia.
Ka US kham mynshwa ka la byrngem ban pynjari ïa ka Russia bad ka jingpynjari kaba arsien ïa ki ri kiba thied ïa ka umphniang jong ka lada ym don kano- kano ka sienjam ban pynkut noh ïa ka thma ha Ukraine. Namar la ka China bad ka India ki long ki ar tylli kiba heh duh kiba ju thied ia ka umphniang jong ka Russia.
