Shillong, Nailar 21
Kum ka jingshimkhia ban khanglad ïa ka jingwan rung tuh jong ki nong Bangladesh shapoh u pud u sam jong ka Jylla, ki bor District jong ka East Khasi Hills kila pynjari da ka korphiw miet ha shilynter ki jaka khappud bad ka Ri Bangladesh, ka ban treikam ha kine ki arbnai ban wan.
Kane ka korphiw miet kan treikam naduh ka por 8 baje mynmiet haduh 6 baje mynstep hapoh u radius ba 1 kilometer na u ‘zero line’ jong ka khappud ka India bad Bangladesh.
Ïa kane ka hukum bala pynmih da ka District Magistrate ka Kong RM Kurbah ha ka sngi Palei, kala khang pyrshah ïa ka ïaid ka ïeng ki briew ha ki jaka khappud da ka jingthmu ban jam ïa u pud bad ka Bangladesh ne wan rung tuh sha khappud India, ka jingïalum briew ba 5 ngut ne palat bad ka jingrah ïa ki tiar kiba lah ban pyndonkam kum ki tiar ïaleh kynthup ki dieng/nar rod bad ki maw, nalor ki kam beaiñ kynthup ïa ka jingkhaïi tuh ïa ki masi, ki mar ki mata, kwai, tympew, ktung, biri, sikret, slasha bad kiwei kiwei.
Ïa kane ka hukum la pynmih haba khmih ïa ka jinglong jingman ba mynta ha Bangladesh ha kaba la ïohi ba ka lah ban don ka jingwan rung tuh sha khappud da ki riew bymman, ki ehrang jong ki kynhun kaikhlaw, ki nongkhaïi tuh bad kiwei kiwei ki kam beaiñ, ong ka hukum ba la pynmih da ka Kong RM Kurbah.
