Shillong, Nailar 21
Ki shipai Border Security Force (BSF) kiba la pynjur ka jingpahara ha ki thaiñ khappud hadien ba ki la shah ther maw ha ki suba nong Bangladesh, ki la hap ban kawang da u ‘grenade’, kaba la pynlong ïa kine ki runar ban phet krad biang sha ka bynta jong ka Bangladesh.
Katkum ka khubor kaba la ïoh na ki pulit la ong ba ka la don ka jingai jingujor ba ha ka 20 tarik mynta u bnai, kata dang ha ka por 4.25 mynstep, ki BSF hadien ka jingïoh jingtip kaba bniah, ki shipai BSF jong ka BOP Nayabazar ha East Khasi Hills ki la lap ïa ka jingdon jong ki suba nongkhaïi tuh na Bangladesh kiba don kumba 9 ne 10 ngut ha lynter jong ka khappud bym pat don jingker.
Ka khubor ka la ïathuh ba haba ki BSF ki la pyrshang ban khanglad, kine ki suba nong Bangladesh ki la kawang da ki maw sha ki BSF. Kumta ban ïada bad pynphai kylla, ki BSF ki la kawang da uwei u ‘stun grenade’ kaba la pynlong ïa kine ki nongkhaïi tuh ban phet sha ka bynta jong ka Bangladesh.
Kham hadien na ka liang jong ki shipai BSF ki la ïoh ban kurup noh ïa ki ar tylli ki masi na katei ka jaka ba la jia katei ka jingjia.
