Shillong, Nailar 21
Ka Nangkiew Irat SC ka la lah ban pynliem noh ïa ka Mawlai SC da 2-0 kol ha ka lympung ïalehkai Shillong Premier League ha ka sngi Palei ha SSA Stadium kaba ha First Ground, Polo.
Kane ka la wan urlong lyngba u Himan -shu Patil (14′) bad Ronaldkydon L Nonglait (68′) na ka bynta ban pynlong ïa ka Nangkiew ban lamkhmat ha kane ka lympung da kaba kamai 6 point na ki ar sien ïakhun.
Ha lyndet kane ka nam jop jong ka Nangkiew Irat ka long ba kum ka kynhun, ka la lah ba kan lamkhmat jan ha baroh ki bynta ka jingïalehkai, ha kaba kim shim la ailad suk ïa ki rangïalehkai ka Mawlai ba kin pynsted ïa ka rukom ïalehkai jong ki.
Shwa ba kine ki ar kynhun kin ïa rung shapdeng ka madan na ka bynta kane ka jingïakhun, baroh ar ki la khur ïa la ki nam jop ha ki jingialehkai ba nyngkong, ha kaba ka Mawlai SC ka la pynliem da 6-2 kol ïa ka Sawmer SC bad ka Nangkiew Irat ka la jop ïa ka Nongrim Hills da 3-1 kol.
Kine ki artylli ki kol kiba ka Mawlai SC ka la shah thep ha ka Nangkiew Irat ka dei tang na ki jingbakla jong ki rangïalehkai kat haduh ba kan mad syndon ïa ka jingshah rem.
Wat la katta ruh, kaba itynnad na ka liang ki rangïalehkai ka Mawlai ka long ba kampher wat hadien ba ki la shah tam da kine ki ar kol, hynrei kim shim la duh mynsiem, pynban ki ïai pyrshang beit thop ban ïoh pynphai, hynrei kim shym la lah ban pynurlong haduh kaba kut ka jingïalehkai.
Ka jingïalehkai mynta ka sngi Thohdieng kan long hapdeng ka Shillong Lajong FC pyrshah ia ka Malki SC ha ka por 4:30 nohphai sngi.
