Shillong, Nailar 21
Ha ka jingïakhun pyrshah ïa ki jingdih kiba sniew. Ki pulit ki la ïoh ban kurup ïa u ‘Drok’ u ba shongdor kumba T.400 klur bad kem haduh 1061 ngut ki briew kiba donkti ha kaban die beaiñ ïa u ‘Drok’ ha kine ki san snem ba la dep.
“Ka jingïoh kurup baroh ka shongdor palat ïa ka T.412 Klur, ïa kaba haduh mynta ngi lah dep ban thang noh shiteng hapoh ka karkhana jong ka Star Cement ha East Jaiñtia Hills. 1061 ngut ki briew ki la shah kem ha kine ki 5 snem ba la dep” la ong u Superintendent of Police (SP) jong ka Anti-Narcotic Task Force (ANTF) u Giri Prasad haba ïakren bad ki nongthoh khubor ha ka sngi Palei.
Ki jingdih pynbuaid kiba la ïoh kurup ki kynthup 41,000 gram u Heroin, 12716 Kg u Ganja, 2 kg u Opium, 76 kg ki Yaba Tablets, 14 kg u Crystal Meth, 16 kg kiwei pat ki jingdih pynbuaid, 1.74 lak bilor ka Codeine Cough Syrup kiba la ïoh kurup hapoh ka jylla.
U Prasad u la pynpaw ba kala don ka jingkiew ha ki jingjia jong ka jingkhaïi ïa u ‘Drok’ ha ka jylla naduh u snem 2023 haduh u 2025 bad la jan don kumba 100 ngut kiba la shah kem tang mynta u snem.
Katkum ka jingong u SP ANTF, ki don ar jait ki jingkhaïi da kaba pynshong nongrim (Consumer-based), kaba thmu ïa ki samla ka Meghalaya, bad ka Transit-based, ha kaba ïa u ‘Drok’ la shalan lyngba ka jylla sha kiwei pat ki jaka.
Ka ANTF ka la pynleit jingmut bha ha ki jaka rung bad jaka mih, khamtam eh ha Ri Bhoi bad East Jaiñtia Hills, ha kaba bun bha ki jingdih pynbuaid kiba pynrung lyngba kine ki jaka shapoh ka jylla.
“Ki don ki district ANTF ha man la ki district hynrei ka Ri Bhoi bad East Jaiñtia namar ba ki dei ki jaka rung jaka mih na ka bynta ka surok bah (main national highway), kumta ka kham shah ktah bad don jingma na ka bynta ka jingshalan ïa u ‘Drok’. Ngi ïatreilang bad ki ANTF jong ki distrik bapher bapher.” La ong u Prasad.
U Prasad u la ong “Lada phi ïohi ïa ka jingïoh kurup ha kine ki por ba dang shu dep, ngi la pynleit jingmut bha ha ki jaka rung bad jaka mih, namar ka jingïoh kurup ‘Drok’ ka long kaba jur bha ha kine ki ar tylli ki distrik.”
U la bynrap ruh da kaba ong ba ka jingïoh kurup dang shen ïa ki tiar ba la khang pyrshah, haduh 4 klur ha ka shisngi ka dei ka jingkhynra lang hapdeng ka ANTF bad ki pulit ka East Jaiñtia Hills District.
Ka ANTF ka dang khmih lynti ban ïoh noh ïa ka K9 Unit ha u Naiwieng bad kane kan kyntiew shuh shuh ïa ka jinglah ka jong ki ban lap ïa ki jingdih pynbuaid.
