Jowai, Nailar 21
Ka ïew ïawmusiang Jowai kaba dei ka ïew kaba kham thnem ha ka die ka thied ha ki basa die jingdie bapher bapher, ka la kylla long ka jaka kaba ki nongshong die jingdie kila pyni ïa ka mynsiem jong ka jingïatreilang ban pynlong ïa ki basa ïew kiba khuid ba suba.
Kane kala wan long da ka jingshimkhia jong ka Commissionerate Food Safety ha ka jinglam khmat ka Deputy Commissioner ka Kong BDS Mukhim ban pynlong ïa ka jingpynkhuid paidbah ne cleaning drive ha kine ki basa ïew.
Kane ka sienjam kala wanrah ïa ki komiti ïew, ki nongdie jingdie, ki trai dukan ha ryngkat ki 200 ngut ki NCC na ki 9 tylli ki skul bad kolej ban ïatylli ban kyntiew ïa ka khuid ka suba ha ki jaka paidbah.
Ha kane ka jingpynkhuid, la sakhi ba ki nongshong ïew kila kyrshut bad sait khuid bha ïa la ki jong ki basa ki jong ki bad hadien pat ki sa ai rong khnang ban pyniphuh iphieng ïa ki basa ki jong ki.
Ïa ki ñiut ki ñier ba mih na ka jingpynkhuid, ka Kong BDS Mukhim kala pyntip ba la shimti da ka Jowai Municipal Board ban bret ïa ki.
Shwa ka jingpynkhuid, ka Kong BDS Mukhim haba ai jingkren sha ki paidbah kala khot ïa ka jingïatreilang na baroh ki bynta jong ka imlang sahlang ban pynneh pynsah ïa ka jingkhuid jingsuba. Ka la ban jur ruh ba dei tang lyngba ka jingïatreilang na baroh, lah ban ïoh ïa ka imlang sahlang kaba khuid bad kaba koit ba khiah.
Ka Assistant Commissioner ka LBR Marak, MCS ruh ka la ai jingkren ha ka jingïalang, kala ban jur ïa ka jingdonkam jong ka jingkitkhlieh lang ha kaba pynneh ïa ka jingkhuid jingsuba.
Ka LBR Marak kala ong ba ka jingkhuid kam dei tang ban pynkhuid ïa ki sawdong sawkun hynrei ka dei ruh ban tei ïa ka imlang sahlang kaba don burom. Ka jingpynneh pynsah ïa ka mariang kaba khuid, ka pynbha ïa ka koit ka khiah bad ka jinglong jingman.
Ka la kyntu ïa baroh ban shim ïa ki rukom treikam kiba lah ban pynneh pynsah ha ka jingim ba man ka sngi. Ka la pynpaw ka jingsngewnguh ïa ka sienjam jong ka tnat Food Safety bad ka la ai khublei ïa ka jingïashim bynta shitrhem jong ki cadet jong ka NCC, ki komiti ïew, ki nongdie dukan bad ki nongdie jingdie ha kane ka jingpynkhuid.
