Jowai, Nailar 21
Ka lympung ïalehkai Super Division (Kelsiroy Pala Memorial) bad ka 2nd Division (Joybell Suïam Memorial Football Tournament) ba la pynïaid da ka Thadlaskeiñ Sports Association (TSA) ka la jam shaphrang ha madan Wahïajer Multi Sports Complex.
Ha ka jingïalehkai 2nd Division kaba la long ha ka sngi Palei, hapdeng ka Ïawpynsin Wahïajer bad Iongshiwiat ki la ïasam mar shi point hadien ba ki la ïakhaid mar 2-2 kol.
Na ka bynta ki kol jong ka Iongshiwiat la thep da u Tur Pale (12) bad Helpmi Dhar (37). Katba na ka Ïawpynsin Wahïajer la thep da u Lumlang Nongpluh (54) bad Marbait Nongpluh (69).
Ha ka jingïalehkai kaba bud, ka Maskut ka la pynliem noh ïa ka Mukhla Wahshnong da 1-0 kol bad ïa kane la thep da u Elias Nongspung (32).
Haba phai sha ka jingïalehkai Super Division, ka jingïakhun kala kut ha ka jingïakhaid mar 1-1 kol hapdeng ka Pohskur Phlongingkhaw bad Mookyndur.
Watla kine ki kynhun kim shym la lah ban thep kol ha ka kylla step, hynrei ka Pohskur ka la lah ban pynurlong ha ka kylla miet lyngba u Seibor Nongrum (55) hashwa ba u Samehi Suting (61) un pynphai kylla na ka bynta ka Mookyndur.
Ha ka sngi Thohdieng ka jingïalehkai ha ka 2nd Division kan long hapdeng ka Tympang SC pyrshah ïa ka Pdienlum SC ha ka por 9 baje mynstep, katba ka Maya SC ïa ka Mynkrem United ha ka por 12 baje mynsngi. Ha ka Super Division, ka Wahïajer SC kan ïakhun pyrshah ïa ka Mukhlaraij ha ka por 1 baje mynsngi, katba ka Heibor Ïong-I FC ïa ka Nongkhrohrim ha ka por 3 baje nohphai sngi.
