Shillong, Nailar 21
Ka Hynñiewtrep Youth Council (HYC) hapoh ka jingïalam u President Rangbah u Bah Roykupar Synrem ha ka 21 Tarik u Nailar 2025, ka la leit ban ïakynduh ïa ka Joint Labour Commissioner ka Kong M.Thabah ban ïakren halor ka jingleh tuh ha ka rukom applai ïa ka Registration Card na bynta ki bar jylla kiba wan ban bylla sha kane ka jylla khamtam ha ka khyrdop talasi lane ka Infiltration Check Gate kaba don ha Byrnihat.
Haba kren sha ki lad pathai khubor u Bah Roykupar Synrem u la ong ba bun ki bar jylla kiba wan sha kane ka jylla ki don tang ka Acknowledgement Slip katba ïa ka Registration Card pat kim don satia.
U la ong ba kane ym lah ban pdiang da lei-lei ruh, namar ka jingdon tang ïa kane ka slip kam lah ban pynshisha ba uno-uno u ba wan sha kane ka jylla u dei u nong India.
“Ka seng ka la ap miet bad peit pyrman ha ki jaka ba ki poiwir-poihap ki wan ban rung shapoh ka jylla jong jong ngi. Ngi la sdang naduh ka 14 tarik mynta u bnai bad kumjuh ruh ban pynlong ïa ki jingkhynra ha kylleng ka ri lum Khasi bad Jaiñtia. Ha kane ka jingap miet ngi lap ïa ka jingdkoh ban pyntreikam bakla ïa ki kyndon jong ka aiñ ïa kiba ka sorkar hi ka la shna” la ong u Bah Roykupar.
Nalorkata, u la ong ruh ba bunsien ka jur ruh ka jingïadie ïathied ïa ka registration card khamtam ha ka Infiltration Check Gate kaba don ha Byrnihat.
“Ym tang katta hynrei ha kane ka jingap miet jong ka seng ban khynra ha Infiltration Check Gate, la lap ba kiba bun ki kot ki sla ba la shu shna thok bad kiba la shu pyndonkam bakla, ba la shna da mano-mano wat ban shna ruh ïa ka Registration Card bad Acknowledgement Slip kiba thok” la bynrap u Bah Roykupar.
Kumta u la ong ba ka seng ka la dawa na ka tnad Labour ba kan hap ban pynshitom ïa ki briew kiba donkti ha kane ka kam.
Ka seng ka la dawa ruh na ka tnad Labour ba kan ai kano-kano ka jingthoh lane ka jingbthah ïa ki Infiltration Check Gate ban ong, ba kim dei ban pdiang ïa ki Acknowledgement Slip, namar ka jingdon ïa ka Acknowledgement Slip kam pynshisha ba ki dei ki nong India.
