Shillong, Nailar 21
U MLA ka Nongstoiñ Konstitwensi Bah Gabriel Wahlang u la pynpaw ka jingsngewkmen ïa ka jingwan rung sa u Bah Ronnie V Lyngdoh, u MLA na Mylliem sha ka sem jong ka NPP.
“Ka jingmih noh u Bah RV Lyngdoh ban rung sha ka NPP ka dang pynskhem ïa ka jingphet jong ngi na ka Congress ban rung sha ka NPP,” u la ong.
U Bah Gabriel u la ong ba ki lai ngut ki MLA ka Congress kata ma u, Dr. C Lyngdoh na Umsning, Bah Charles Marngar na Mawhati ki la rung sha ka NPP na bynta ka roi ka par.
U la ong ba kam don jingmyntoi ban shong ha liang pyrshah namar um ïoh eiei kumta donkam ban rung sha ka seng kaba synshar ïa ka jylla ban ïoh ïa ki kam pynroi.
Haba kylli la ka don ne em ka jingrung Myntri napdeng jong kine ki lai ngut kiba la phet na Congress, u Bah Gabriel u la ong kum kata kam shym la don namar ki rung na ka bynta ka roi ka par jong ka konstitwensi.
“Ngi sngewkmen haba ngi rung sha ka NPP, ngi la sdang ban ïoh ïa ki kam pynroi namar naduh u Conrad K Sangma uba dei u Myntri Rangbah ka jylla, ki ar ngut ki Symbud Myntri Rangbah Bah Prestone Tynsong bad Bah Sniawbhalang ki long kiba la kloi ban sngap haba ki donkam ki kam pynroi hapoh konstitwensi,” u la ong.
Ha kajuh ka por u la pynkynmaw ba ka jingmih noh ki lai ngut ki MLA Congress ka daw ba nyngkong ka dei ba kim sngewtynnad ïa u nongïalam ka Congress bad kaba ar ka dei ba ki donkam ïa ka roi ka par hapoh ka konstitwensi.
