Shillong, Nailar 21
Ka Sorkar Jylla lyngba u Myntri ka tnad Social Welfare u Bah Paul Lyngdoh ha ka 21 Tarik u Nailar 2025 ka la pynkupburom ïa ki 8 ngut ki pulit ka Anti Narcotic Task Force (ANTF).
Kane ka jingpynkup burom ïa ki Pulit ka ANTF kadei kum shibynta ban ai jingithuh ïa ka kam ba ki trei na ka bynta ban pynduh jait ïa u jingdih pynbuaid u “Drok” napoh ka Jylla.
Ha kane ka sngi pynkup burom ïa kitei ki pulit ka ANTF la ïadonlang ruh u SP ka ANTF, U Mission Director ka Dream nalor kiwei kiwei de.
Haba kren sha ki lad pathai khubor na ka liang u Bah Paul Lyngdoh u la ong ba ki pulit ka jylla ki long kiba tbit bha bad kane ka la paw shai haka jingjia shah pynïap ba la jia ha Sohra bad kumjuh ruh ka jinglah jong ki pulit ANTF ban ïakhun ïa ka jingwan rung u ‘Drok’ , halor ka jinglah jong ki dang shen ban ïoh kurup ïa u ‘Drok’ u ba shongdor haduh palat T.4 klur.
U la pynpaw ïa ka jingngeit skhem ba ka jylla kan jop halor ka jingpynduhjait ïa ka kam khaïi ‘Drok’ da kaba pynïasyriem bad ka jingjop jong ka mynshwa ha kaba pynduh pyndam ïa ki lehnoh tang da kaba pyndonkam ïa la ka jong ka bor pulit, khlem da khot ïa ki shipai, ym kum kiwei pat ki jylla ha kane ka thaiñ.
“Ka kynhun ANTF ka la nang khlaiñ bor na ka por sha ka por. Ki paidbah kiba shu peit ïa ki khubor ha ki TV ne ki Mobile Phone ki ju kynthoh ïa ki jingkynthoh ba bunjaid hynrei ki pulit ki sngap jar bad ki trei ïa ki kam” la ong u Bah Paul.
U la pynpaw ruh ïa ka jingkiew jong ka jylla ha kaba ïakhun ïa ki jingdih pyn buaid, ha kaba la ïoh kurup ïa ki mar beaiñ kiba shongdor palat T.40 klur tyngka. “Kane ka pyni ba ngi don ïa ka jingtbit, ka jinglah bad ka bor ban ïakhun ïa kane ka jingeh bad ban pynthikna ba yn pynduh pyndam noh ïa ka”, u la bynrap.
U Bah Paul u la batai ïa ka jingïaleh pyrshah ïa u ‘Drok’ kum ka kam “Pynïap ne shah pynïap” bad u la ong, “Ngi la shah rem ha kane, ngi la mih kum ki nongjop. Ngi la kylla long ki nongshah lehbeiñ ne ngi la kylla long ki nongjop. Nga tikna ba ka Meghalaya kan kylla long ka nongjop ha kane ka thma pyrshah ïa u ‘Drok’.”
Shuh shuh u la ong ba ki pulit ka jylla kim ju donkam ka jingïarap na ki shipai hynrei ki leh hi ïa ka kam, kumta u la ong ki pulit ka Jylla Meghalaya kidei kawei ka kynhun pulit kaba tbit ha ka Ri India.
Haba pynpaw ïa ka jingshaniah ha ki bor pulit, u Bah Paul Lyngdoh u la ong ba ka Jylla Meghalaya ka dei kawei na ki khyndiat tylli ki jylla kaba la jop ban pynduh jait ïa ki kam lehnoh lyngba ka tnad pulit.
“Ngim shym la khot ïa ki shipai haba kiwei pat ki jylla ki hap ban leh kumta. Ka Nagaland ka hap ban leh kumta, ka Mizoram ka hap ban leh kumta, ka Punjab ka hap ban leh kumta, ki thaiñ kiba pyntriem da ki Maoist Naxalite ki hap ban leh kumta, ka Assam ka hap ban leh kumta” u la ong.
Da kaba ong ruh ba ka Meghalaya ka dei kawei na ki jylla ba bun tam kiba dang samla ha India. U Myntri u la ban jur ïa ka jingdonkam ban bei tyngka ha ki samla jong ka Meghalaya – ha kaba 65% na ki nongshong shnong jong ka jylla ki don hapoh ka rta kaba 35 snem – na ka jingpyrshang ba man ka por ban pynngop ïa ki sha ki jingma jong u ‘Drok’ bad kiwei kiwei ki jingdih pynbuaid.
U Bah Lyngdoh u la pynthikna ruh ba ïa ka Memorandum ba la aiti da ka ANTF yn sa ïakynduh da ka jingbei tyngka mardor na ka projek DREAM.
U la batai ïa ki kam ba bun jait jong ka ‘DREAM Mission’, kiba kynthup ïa ka jingïatreilang kaba jan hapdeng ki tnad bapher bapher, kynthup ïa ki ‘home police’, ka imlang sahlang, ka pule puthi, ka koit ka khiah, bad ka aiñ. Kane ka rukom treikam kaba ïadei bad ka jingthmu ban ïaleh pyrshah ïa ka jingma jong u ‘Drok’ ha ka rukom kaba biang.
Da kaba pynpaw ba ka ANTF ka buh jingeh ïa ki nongkhaïi, u la pynpaw ba ka ANTF mynta ka la rung sha ki jaka ba mynshuwa kiba kim shym la leit peit, kum hapoh ka Cantonment Board, kiba long ki jaka ba roi bha ha ka jingdie ‘Drok’.
U Bah Paul u la pynthikna ruh ba ka ANTF kan dang pynjur ban khynra ïa ki nongkhaïi ‘Drok’ ban pynduh jait ïa ka jingma jong u ‘Drok’ na ka jylla.
