Shillong, Nailar 21
U MLA ka BJP uba dei ruh u Chairman ka Meghalaya Tourism Development Corporation (MTDC) Limited, u Bah Sanbor Shullai haba ai ka jingïaroh ïa ka Sorkar MDA kaba la wanrah ïa ki katto katne ki lad pynroi na ka bynta ban kyntiew ïa ka kam jngohkai pyrthei, u la ong ba ka tnat jngohkai pyrthei hapoh ka jingïalam u Myntri Rangbah ka Jylla, u Conrad K Sangma ka la ktah ïa ki kyrdan kiba thymmai ki bym pat ju kynjoh da kino kino ki Sorkar ba mynshuwa.
U ong ba ka Shillong mynta ka dei kawei na ki jaka ba la wad bad peit bniah bha haba ïadei bad ka jingdon ïa ki jaka jngohkai kiba itynnad.
“Ki projek pynroi kiba don hapoh ka tnat jngohkai pyrthei kin sdang ban seisoh ïa ngi na ka jingtrei shitom jong ngi hapoh ki khyndiat snem ban wan”, ong u Bah Sanbor.
U Bah Sanbor u la ong ba ka Jylla Meghalaya kaba mynshwa kam don wat tang kino kino ki ïingbasa ne ki ‘hotel five star’ hynrei mynta ka don da ki jingthmu bapher bapher kiba kum kine.
U la pynpaw ba da ki katto katne ki jingthmu pynroi, ka jylla kan pynmih khajna kaba bun na ka kam jngohkai pyrthei nalor ba kan pynmih shibun ki lad kamai bad ong ba kum ka seng kaba dei ka bynta jong ka Sorkar, ka don ïa ka jingkitkhlieh.
Dang shen haba kren sha ki Nongkitkam bad Nongtrei jong ka BJP South Shillong, u Bah Sanbor u la ai jingmut ba ka BJP ka dei ban poi sha ki tynrai.
Nalor kata, u la ai jingmut ba ki nongïalam ka BJP ki donkam ban bishar bniah ïa ka jingma kaba lah ban mih shwa ban kren pyrshah ïa ka Sorkar ha kaba ka BJP ruh ka dei ka bynta jong ka jingïateh lok bad ka Sorkar.
“Lada ngi don kano kano ka jingbym sngewhun ngi dei ban ïakren bad ka Sorkar ban ïa kaba pynpaw lut sha ki paidbah”, ong u Bah Sanbor.
U Bah Sanbor u la pynpaw shuh shuh ba ka seng ka don ka lad kaba khraw ban jop katto katne ki shuki kiba lah ban long bad ba ka jingthmu ba kongsan ka dei ban pynbun ïa ka bhah ne ki shuki ha ka ilekshon ban wan.
