Khliehriat, Nailar 21
Ki pulit ka East Jaiñtia Hills District kila lap ïa kawei ka met ïap ba la jan kem pyut jong kawei ka briew ka bym lah ban ithuh.
Ïa kane ka metïap la lap ha ka 19 tarik Nailar ha ka thaiñ Sookilo ha East Jaiñtia Hills District.
Katei ka briew kaba la antad ban don kumba 40 snem rta, la suba ba ka dei ka bar Jylla, la lap ruh ba ym shym la don jaiñ shuh ha ka met jong ka, bad la suba ruh ba kala shah batbor bad shah pynïap.
Ka khubor na u SP ka East Jaiñtia Hills, ka ïathuh ba la pynlong ïa ka Magisterial Inquest bad jingkhmih bniah (spot post mortem) ha katei hi ka jaka khnang ban pynthikna ïa ka daw jong ka jingïap kane ka briew.
U la pyntip ruh ba la register ïa ka case halor ka jingsuba shah pynïap ha thanad Khliehriat.
Ïa ka met la buh ha jaka buh metïap bad u SP u la kyrpad ruh ïa ka jingïarap lang jong ki paidbah ban pynithuh ïa katei ka met ïap.
