Shillong, Nailar 21
U Samla Manbhalang Phankon uba dei u samla nongwad Right To Information (RTI) napoh ka Jylla u la pynshai sha ki paidbah ka Jylla ha kaba ïadei bad ka jubab RTI kaba u la ïohpdiang halor ka karkhana saiñ dewbilat ïa kaba la tip kum ka Mawmluh Cherra Cement Limited (MCCL) kaba khlem shem la treikam shuh mynta
Une u Samla u la wad RTI bad buh ka jingkylli ba ki don katno ngut ki nongtrei kiba don haduh mynta ha katei ka karkhana saiñ dewbilat kaba don ha Mawmluh bad katkum ka jubab ba ula ïohpdiang ka long ba ki don haduh 256 ngut ki nongtrei ha katei ka karkhana ha kaba 21 ngut ki dei ki Ophisar bad 235 ngut pat ki dei ki nongtrei.
U la buh jingkylli ruh ba ka poi katno ka jinglut jingsep ha ka shisnem ban siew ïa ka tulop jong ki nongtrei bad ha u snem aiu ba la sam ïa ka tulop jong ki nongtrei ka karkhana saiñ dewbilat ha Mawmluh, bad katkum ka jubab ba ula ïohpdiang ka long namarba ka karkhana kam trei kam shuh, kumta ïa ka tulop jong ki nongtrei la shu siew khyndiat khynsoit bad kata ruh ka long tang lada ka wan ka pisa na ka Sorkar Jylla.
U Samla Manbhalang u la ong ba hadien ba u la ïohpdiang ïa kane ka jubab lyngba kane ka RTI kam shym la pynhun satia ïa u, kumta u la leit ban kylli biang sa napoh ka ophis jong ka MCCL bad ban buh ïa ki jingkylli ha kaba ïadei bad ka jubab ba ula ïohpdiang na ka RTI kaba la ong ba ïa ka tulop jong ki nongtrei la lah ban siew sa tang lada ka wan ka pisa na ka Sorkar.
Halor kane ka bynta, u la buh jingkylli ba balei ka Sorkar kam lah ban siew tulop ïa ki nongtrei jong ka karkhana katba ïa ka tulop jong ki Chairman bad ki Vice-Chairman ka lah ban siew bad naei ka Sorkar ka don ïa ka pisa ban siew tulop ïa ki.
“Kumno ka Sorkar Jylla ka don pisa pat ban thung ïa ki Chairman, Co-Chairman, Vice-Chairman bad kumta ter ter ha ka MCCL bad katkum ka RTI ba ngi lap ki don haduh 5 ngut? Ka jingkylli mynta ka long naei ka Sorkar Jylla hapoh ka jingïalam ka NPP ka ïoh pisa ban siew ïa ka tulop bad ka bailutksan ne ka bai leit bai wan bad kumta ter-ter jong ki Chairman, Co-Chairman bad Vice-Chairman?”, buh jingkylli u samla Phankon.
Na ka liang une u Samla lem bad ka kynhun jong u, ki la pynpaw ba kim don eiei ban ong halor kane ka bynta hynrei ka shong sa ha u paidbah ban bishar bniah namar ki paidbah mynta ki la long kiba shemphang bad kin dei ki paidbah ki ban bishar hi ïa ki kam kiba ka Sorkar ba la ïalam da ka NPP ka la leh.
