Shillong, Nailar 21
Ka Chairperson jong ka Meghalaya State Commission for Protection of Child Rights (MSCPCR), ka Agatha Sangma ka la thoh da ka shithi sha u Myntri Rangbah ka Jylla, u Conrad K Sangma, da kaba kyntu ïa u ban pyntreikam ïa ka rukom treikam kaba ryntih na ka bynta ka bha ka miat jong ki ksew surok ha ka Jylla.
Ha ka shithi jong ka ba la soi ha ka 21 tarik Nailar, 2025, ka Chairperson jong ka Commission, ka Agatha K Sangma ka la kyrpad ïa u Myntri Rangbah ban pynkhlaiñ ïa ka bha ka miat jong ki ksew surok hapoh ka Jylla khamtam ha ki jaka Sor kiba don bun ki ksew surok.
Ka la ong ba ki ksew surok ki dei ki jingthaw kiba don jingsngew kiba ïadon bynta ha ki jaka bad ki shnong, bad ka jingsumar jong ki ka pynpaw ïa ka jingsngewrit bad ka jinglong jong ka imlang sahlang.
“Ka ri India ka don ka pateng kaba riewspah jong ka Ahimsa (ka jingbym leh donbor) bad ka karuna (ka jingsngewrit) ïa ki jingthaw ba im baroh. Kumba u Mahatma Gandhi u la ong da ki kyntien kiba sngewtynnad ba: “Ïa ka jingkhraw jong ka jaidbynriew bad ïa ka jingkiew ha ka akor jong ka lah ban bishar na ka rukom leh jong ka ïa ki mrad”, ong ka Chairperson.
Shuh-shuh, ka Chairperson kala ban jur ïa ka jingdonkam ban pynlong ïa ka prokram ba la aiti kyrpang na ka bynta ban pynduh khun bad ai dawai ïa ki ksew surok, ban pynthikna ïa ka jingbha jingmiat jong ki bad ka jingim lang kaba ïadei.
Nalorkata, kala ai jingmut ruh ban thaw ïa ki jaka ai bam ba la buh kyrpang ha kylleng ki shnong bad ki nongbah, ha kaba ki nongshong shnong kiba don ïa ka mynsiem ieid mrad ki lah ban pynbiang ïa ki jingbam ha ka rukom kaba la pynbeit bad kaba shngaiñ.
Shuh-shuh, ki jingpynsngewthuh kiba pynshlur ïa ki briew ban ïohi ïa ki ksew surok kum ki paralok, katba ki dang ïatreilang bad ki nongtrei mon sngewbha bad ki kynhun ai jingïarap ban kyntiew ïa ka jingsumar bad jingïalong ryngkat.
Ka la ong ba ka Sorkar Pdeng, lyngba ka Press Information Bureau (PIB), dang shen ka la pynpaw biang ïa ka jingkular jong ka ban weng ïa ka jingeh jong ki ksew surok da kaba pyndonkam da ka rukom kaba long briew bad ka stad saïan, da kaba pynleit jingmut ha ka prokram ban pynduna ïa ka jingpynkha ïa ki mrad ne ka Animal Birth Control (ABC) hapoh ka Aiñ ban ïada na ka jingshah lehbeiñ ki mrad ne ka Prevention of Cruelty to Animals Act, 1960.
“Nga ngeit skhem ba hapoh ka jingïalam ba don jingthmu jong phi, ka Meghalaya ka lah ban long ka Jylla kum ka nuksa kaba pynpaw ïa ka mynsiem bashisha jong ka ahimsa bad ka jingïalong kawei, kaba buh nuksa ïa ka ri baroh kawei”, bynrap ka Chairperson.
