Mawkyrwat, Nailar 21
Halor ka jingwan thombor jong ka kynhun pyntriem na ka ri Bangladesh ha kine ki khyndiat taïew ba ladep ha ka thaiñ Khonjoy, South West Khasi Hills District, na ka liang u Myntri Rangbah ka jylla u Conrad Sangma u la phah ïa ka kynhun kyrpang ban leit wad bniah ha kaba ïadei bad katei ka jingjia, kaba la pynshong syier ïa ki paidbah.
Kane ka kynhun ba lai ngut ka kynthup na ka (official delegation) ba la phah da u Myntri Rangbah u Conrad K Sangma bad u Myntri Sorkar ba peit ïa ka tnat Kam Pohïing u Bah Prestone Tynsong, ki kynthup ïa u Marthon J Sangma u MLA ka Mendipathar uba dei u Adviser ka Sorkar lyngba ka tnat Bording, u Bah Himalaya M Shangpliang, Adviser ka tnad pule puthi ka Sorkar bad u Bah Kitborlang Nongrem uba dei u Vice Chairman.
Kane ka jingphah u Conrad bad u Bah Prestone, ka dei hadien ba kila ïoh pdiang ïa ka shithi ba la phah da ki paidbah nongshong shnong ka thaiñ Khonjoy bad Maheskhola halor ka jingshong syier ki paidbah kiba shong basah ha kane ka thaiñ khappud.
Ha kane ka jingleit sha katei ka thaiñ, kine ki lai ngut kiba la phah da ka Sorkar kila leit ban ïakynduh bad ki paidbah jong ki lai tylli ki shnong kiba kynthup ha ka shnong Khonjoy B, ka shnong Rangdongai bad ha ka shnong Maheskhola bad la pynlong ruh ïa ka jingïalang ban ïoh jingtip ha kaba ïadei bad ka jingeh ba kine ki paidbah nongshong ki ïakynduh.
Ha ka jingïakynduh, ki rangbah bad ki nongïalam shnong kila aiti da ka dorkhas sha u Myntri Rangbah lyngba kine ki lai ngut ki rangbah ban pynsngew ïa ka jingdonkam jong ki paidbah kiba shong ba sah ha kane ka thaiñ.
Haba kren sha ki lad pathai khubor, u Marthon J Sangma u la ong ba u la ïakynduh markhmat bad ki paidbah nongshong shnong jong ki lai tylli ki shnong kiba la shah ktah na ka jingwan thombor ki nong Bangladesh bad ba la ïoh jingtip ba bun ha kaba ïadei bad kane ka jingjia kaba dang shu jia shen bad la ïoh ban tip ruh ïa ka jingeh ba ki ïakynduh ki paidbah ba shong basah ha ka thaiñ khappud.
U la ïathuh ba ki paidbah kila pyntip ba wat lada la don ka jingker sainar shiah ha shilynter ka khappud hynrei ki don ki bynta bynta ba kane ka jingker sainar kala khyllem noh na ka daw jong ka jingjur u slap bad ki don ruh ki jaka ba ki ïa jngai na ki BOP, ong u Marthon.
Shuh shuh u la ong, kumba long mynta ki paidbah kim da don than shuh ka jingtieng bad ka jingsyier namar ba ki pulit kila pynkhlaiñ ïa ka jingpahara ha ryngkat ka jingïatreilang bad ki shipai BSF.
U Bah Himalaya M Shangpliang u la ïathuh ba kila ïoh jingtip na ki paidbah ka shnong Maheskhola, ba ki nong Bangladesh kila ïaid bad rung sha India lyngba ka Maheskhola na ki jaka ker sainar shiah kiba la julor bad pra bad na ka liang ki paidbah kila kyntu ba dei ban peit bha ïa kine ki jaka ker sainar shiah kiba la pra.
“Ka jingïoh lad kine ki nong Bangladesh ka buh ruh ïa ka jingma ïa ki paidbah nongshong shnong bad khamtam eh ïa ki kynthei bad ki longkmie na ka jingshah thombor,” ong u Bah Shangpliang bad bynrap ruh “Ngi la dep ban ïakren bad u SP ka SWKH u Bah B Jyrwa uba la pyntip ba u dang pan shuh shuh ki bor pahara ban phah pahara ha kane ka dong ka thaiñ”.
Shuh shuh u Bah Shangpliang u la pyntip ba ha kaba ïadei bad kane ka jinglap bad ka jingshem ka jong ki na kine ki lai tylli ki shnong, kin sa ai da ka kaiphod sha u Myntri Rangbah bad kumjuh ruh sha u Myntri ka tnat Kam Pohïing, khnang ba kin lah ban leh eiei halor kine kiei kiei baroh.
