Jowai, Nailar 21
Ka jingjia aksident kali kaba la jia hajan ka pung Thadlaskeiñ, West Jaiñtia Hills District kala wanrah ïa ka jingduh noh ïa ki ar tylli ki mynsiem briew, hadien ba ka trok kaba kit clinker kala kylla bad ban ïa ka Maruti Eeco haduh ba kan da julor bad dam syndah syndon phom.
Kiba la khlad ha kane ka jingjia ki long u Convince Susngi na Nangbah, West Jaiñtia Hills District uba la ñiah ïa ka Maruti Eeco bad i khunlung ba dang 2 snem u Hawasan Sari uba la bah shadien da ka kmie ka Kong Sooki Sari.
Kane ka jingjia aksident kala jia ha ka step 21 tarik Nailar ha ka por 11 shiteng eiei ha ka surok bah NH-6 ha Thadlaskeiñ, Mukhla.
Ha kane ka jingjia ka kali Eeco kaba don ïa u number ML04-E-0731 kala shah ban ha ka trok bad julor phom, katba ar tylli kiwei pat ki kali kila lait salit.
Kane ka trok ka dei kaba don ïa registration number UP76-T-1960 kaba kit clinker kaba wan na ka thaiñ East Jaiñtia Hills, haba poi ha katei ka jaka, kala kylla bad kala ban ïa ka kali Maruti Eeco haduh ba u nongñiah u la sahkut shapoh.
Ha kane ka jingjia, ar ngut ki shikmie shikhun kiba ïaid ha surok kila shah syllad ha kane ka trok bad mar mar la pynkit sha ka jaka sumar na ka daw ka jingmynsaw jur.
Ki pulit ki ïathuh ba ïa u Convince Susngi, la shimpor 3 kynta ïa ki pulit ban ïoh sei ïa u namar ba kila hap ban phah ïa bun tylli ki kali khwai. Hadien ba la ïoh sei ïa u Convince la pynkit ïa u sha Jowai Civil Hospital, ha kaba u doktor ula pynbna ba ula khlad noh.
Ïa ka post mortem yn pyndep ha ka 22 tarik Nailar.
Ki pulit kila ïathuh ruh ba i khyllung ba dang ar snem, u Hawasan Sari ruh uba la bah shadien da ka kmie ka Kong Sooki Sari, kiba shah syllad ha ka por ba ïaid lynti, la pynkit mar mar sha Dr Norman Tunnel Hospital, hynrei la pynbna ba u khun u la khlad noh, katba ka kmie ka don ha ka jingshitom jur bad ka don ha ICU jong kane ka hospital.
Ïa ka met ïap jong ine i khyllung la aiti sha ki bahaïing hadien ba la pyndep ïa ka jingtohkit.
Ha kane ka jingjia ar tylli kiwei pat ki kali kila julor. Kawei ka dei ka kali kamai tourist Maruti Alto kaba don ïa u number ML04-C-5529 kaba la shah ban na ka bynta ba shakhmat, katba ka kali ki riew shimet kaba don ïa u number ML04-D-3446 kala julor malu mala.
