Kyiv, Nailar:
Ka tnat shipai Russia ha ka Sngi Balang ka la pynbna, ba ka la ioh ban kurup biang sa ia ki 3 tylli ki shnong kiba don sha ka thaiñ Mihngi jong ka Ukraine bad ki shipai Russia ki la kam ruh ba kane ka jingioh kurup jong ka Russia ia kitei ki bynta ka Ukraine, ka long katba ka US ka dang pyrshang ban wanrah noh ia ka jingiakren iasuk hapdeng ka Russia bad Ukraine.
Ka tnat ïada ri jong ka Russia, ka la ong ha ka Telegram ba ki shipai jongka, ki la “bteng ban ïaid shaphrang shapoh ki jaka ïada jong ki nongshun” ha ka thaiñ Donetsk, kaba la shah hiar thma bha ha kine ki sngi, bad kaba la shah kurup noh ïa ki shnong ba khappud kum ka Sukhetske bad Pankivka.
Ki don hajan kawei ka bynta jong ka phang pdeng ha kaba ki shipai Russia ki la pynpra ïa ki jaka ïada jong ka Ukraine ha ka taiew ba la dep, hapdeng ka jaka pynïaid marbam jong ka Pokrovsk bad Kostiantynivka.
Ki shipai jong ka Russia ki la leit rung teng sha katei ka thaiñ hynrei ki la mih noh namar ka jingpynleit jingmut sha kiwei pat ki bynta jong ka Ukraine, ha u bnai Naitung ba la leit.
Kumta, la ong ba kane ka jingioh kurup ba thymmai jong ki shipai Russia ia ki shnong bad ki bynta jong ka Ukraine, ka long ruh hapdeng ka jingpyrshang kaba jur jong ki nongïalam jong ka US bad na Europe ban pyn-urlong ïa ka jingïateh soskular ban lah ban pynkut noh ïa ka jingleit hiar thma ba khlem sangeh jong ka Russia ha Ukraine, ha kaba kane ka thma ka la neh mynta la jan 4 snem kynthih.
U President ka US, U Donald Trump, u la ong ba u paralok jong u na Russia, u Vladimir Putin, u la mynjur ban iakynduh ia u nongialam jong ka Ukraine bad ban pdiang ia ki katto- katne ki jingkular iada jong ki ri Sepngi na ka bynta ka Kyiv.
Katkum ki lai tylli ki tyllong khubor ba la ioh jingtip, ïa ka jingïakren ha ka Sngi Nyngkong hapdeng u Trump bad u Putin, une u nongïalam ka Russia u la tyrwa ban pynlong ïa ka jingïalang bad u Volodymyr Zelensky hapoh Russia, ha kaba u President ka Ukraine- u Volodymyr Zelensky u la kyntait ia katei ka jingtyrwa jong utei u nongialam ka Russia.
