Shillong, Nailar 21
Ka lympung ïalehkai Second Division Football League 2025 ba la pynïaid da ka Shillong Sports Association (SSA) ka la nangjam shaphrang ha kaba ka Pay For Right (PFR) ka la khur ïa ka jingjop hadien ba ka la pynliem noh ïa ka Tynring SC da 3-2 kol ha ka sngi Palei.
Ha kane ka jingïakhun kaba la long ha SSA Stadium kaba ha First Ground Polo, ka Tynring ka la lah ban ïalehkai bha ha ka kylla step ha kaba tang mar ïasdang ka la pynkhih jar nyngkong eh ha ka minit kaba 2 lyngba u Damonlang Sylliang. Une u rangïalehkai shakhmat u la pynbud biang ïa ka kol kaba ar ha ka minit kaba 24.
Hynrei ka PFR ka la wanphai da ka jingkhlaiñ bor ha ka kylla miet ha kaba ka la ïoh ban thep haduh lai kol lyngba u Adelbert Khongshun ha ka minit kaba 55, kumjuh u Peter Lamare (66) bad u Thymmaibor Mukhim (74) na ka bynta ban khur syndon ïa ka jingjop.
Haba phai sha kawei pat ka jingïakhun kaba ar hapdeng ka Sohryngkham SC bad ka Umphrup SC ki la ïakhaid mar 1-1 kol. Ka Umphrup ka la pynkhih jar nyngkong lyngba u Winjesstar Nongbri (21), hynrei ka Sohryngkham ka la pynphai kylla lyngba u Macheaveen Nongbri (28).
Ka jingïalehkai ha ka sngi Thohdieng kan long hapdeng ka Mawpat SC pyrshah ïa ka Umpling SC ha ka por 11:15 mynstep, katba ka Mawryngkneng SC ïa ka Sohïong SC ha ka por 1:45 mynsngi.
