Imphal, Nailar:
Ka kynhun Foothill Naga Coordination Committee (FNCC) ka la pynrem jur ïa ki kam pyntieng bad pyndik kiba dang ïai bteng da ki lehnoh Kuki, khamtam ïa ki dkhot jong ka kynhun Kuki National Front (President), kiba thmu ïa ki riew paidbah Naga kiba don ha Ireng bad ki shnong ba marjan jong ki Naga ha Manipur.
Ha ka jingpynlait khubor, ka FNCC ka la kynnoh ba ha ka 10 bad 15 tarik u Nailar, 2025, ki lehnoh kiba don tiar ki la rung jubor sha ki jaka jong ki Naga, da kaba byrngem bad lehbeiñ ïa ki nongrep ha ki jaka jong ki. Kine ki jingjia, la ong ka komiti, ki dei ki jingpyrshang ba thmu ban pynjur ïa ki kam pyntieng bad ban pynmih ïa ka jingkulmar.
“Kaba kham shyrkhei ka long ba kine ki lehnoh ki ïaid laitluid ha ka por mynsngi ryngkat bad ki tiar ïaleh, kane ka jingleh kam shym la pynïoh jingshitom ei ei ïa ki”, la ong ka FNCC. “Kane ka jingpyni paidbah ïa ka jingleh donbor da ki tiar ïaleh ka long kaba ym lah ban pdiang bad ka buh jingma beit ïa ka jingshngaiñ, ka burom, bad ka jingdon jong ki briew Naga ha ka thaiñ.”
Ka FNCC kaba la ju pynshlur ïa ka jingsuk, ka la maham ba kum kane ka jingleh pyrshah kam lah ban bteng khlem da tehlakam.
Ka kyrwoh ka ong: “Ngin ym ailad ïa ki briew jong ngi ban im ha ka jingtieng. Lada ka sorkar bad ki bor pahara kim lah ban leh da kaba tyngeh pyrshah ïa kine ki lehnoh, ka FNCC kan pynjari da ka jingkhang pyrshah pura ïa ki jingïaid lynti jong ki Kuki ha baroh ki jaka ba shong ki Naga. Ngin ïada ïa ka jingshngaiñ bad ka burom jong ki briew jong ngi khlem da pyndem.”
Kham mynshwa, ka FNCC ka la pynjari da ka jingkhang ïa ka jingleit jingwan jong ki Kuki ha ki thaiñ Naga naduh ka 15tarik,Naitung haduh ka 9 tarik, Nailar, 2025. Ha ka jingïakren bad ka sorkar Manipur, ki heh sorkar ki la pynshai ba ïa ka surok German/Tiger ba la thmu da ki met Kuki ym shym la mynjur ne ai jingbit.
Ka sorkar ka la pynthikna ba ka aiñ ka donkam ban leh ei ei pyrshah ïa ki jingsna kiba long beaiñ, ha kaba kane kan pynduh ïa ka jingpynsangeh noh ïa ka jingpyntreikam pyrkhing.
