Shillong, Nailar 21
Ïa ka prokram pynsngew-thuh halor ka jinghikai kiew lum ne ka ‘State Level Awareness Program on Sport Climbing and Adventure Activities 2025’ la plie ha ka sngi Palei ha Eastern Command Sport Climbing Node jong ka 58 Gorkha Training Centre (GTC) kaba ha Happy Valley.
Ïa kane ka prokram la wan ban plie da u Director ka tnat ïalehkai ka Sorkar Jylla u D.D. Shira kum u kongsan ha ryngkat ka jingïadon lang u Brig. Joe Sabby, Commandant ka 58 GTC kum u symbud kongsan, u Bah Finely Lad Pariat, General Secre-tary ka Meghalaya State Olympic Association lem bad ki dkhot ka Megha-laya Sport Climbing and Mountaineering Association (MSCMA)
Ïa kane ka prokram kaba ar sngi kynthih la pynïaid da ka MSCMA ha ryngkat ka Eastern Command Sport Climbing Node, 58 GTC bad la kyrshan lang da ka tnat ïalehkai jong ka Sorkar Jylla bad ka jingthmu jong kane ka prokram ka long ban kyntiew ïa kane ka jingïalehkai kiew lum ha kylleng ka Jylla.
Ka thong kaba kongsan ka long ka jingpynrung ïa ka jingkiew lum kaba la shna thymmai (climbing wall) ha katei ka jaka ba la shna na ka bynta baroh lai tylli ki jingïalehkai (international discipline) kum ka Bouldering, Lead bad ka Speed Climbing.
Ha kane ka prokram la wan shim bynta da 96 ngut ki nongshim bynta kiba la wan na kylleng ka Jylla kum na Garo Hills, Jaintia Hills, Ri-Bhoi, West Khasi Hills bad na East Khasi Hills. La wan sakhi ha kane ka sngi da ki khynnah ka Army Public School, Happy Valley ba la pyni ïa ka rukom kiew lum da ka kynhun jong ka Eastern Command.
Ha kane ka sngi, na ka liang ka synjuk ka la pynpaw ïa ka jingsngewnguh ïa u Commandant jong ka 58 Gorkha Training Centre na ka bynta ban pynbiang ïa ka jaka ïalehkai kiew lum (climbing wall).
