Shillong, Nailar 21
Ka kynhun ki ‘thei ïalehkai Under-17 ka Nongjri Presbyterian Secondary School ka la bteng ïa ka jingjop kaba ar ha ka International Subroto Mukherjee Football Cup 2025, hadien ba ka la pynliem noh ïa ka Government Model SR Secondary School Sector 22 kaba na Chandigarh da 3-0 kol ha ka sngi Palei ha nongbah Delhi.
Kane ka nam jop ka la wan lyngba ka Jasmine Syngkli, Rimika Khongkai bad ka Baiaiteilut Mangu na ka bynta ban kamai 6 point na ki ar sien ïakhun ha ka Pool-D.
Kane ka la wan hadien shi sngi ba ka la lah ban pynliem ïa ka International School Sports Organisation (ISSO) da 5-0 kol.
Katkum ka kyrwoh la ong ba katei ka kynhun ïalehkai kaba na Ri Bhoi District ka la lah ban pynpaw ïa ka jingtbit ha ka rukom ïalehkai bad ban sei ïa ki buit ki bor kat haduh ba ka liang pyrshah kam shym la lah ban pynphai wat tang shi kol ruh haduh kaba kut ka jingïalehkai.
Lyngba kane ka jingjop ka Nongjri Presbyterian ka la nangjan ban jam sha ka quarter final ha kane ka lympung, hynrei ka donkam ban khur sa kawei ka jingjop pyrshah ïa ka Dadra and Nagar Haveli and Daman and Diu ha ka sngi Thohdieng ha ka por 6:15 mynstep.
Katkum ka rukom pynïaid ïa kane ka lympung, la ong ba ki kynhun ki ban wan ha ki kyrdan ba hakhlieh na baroh phra tylli ki pool kin ïoh rung sha ka quarter final, kaba la thmu ban pynlong ha ka 24 tarik, katba ka semi final ha ka 25 tarik bad ka final ha ka 28 tarik mynta u bnai.
