Imphal, Nailar:
U Myntri Rangbah barim ka jylla Manipur, u N. Biren Singh u la ïaroh ïa ka tnat shipai Assam Rifles kaba la lum ïa ki Biometric jong ki briew kiba la wan rung be-aiñ sha India na Myanmar, da kaba ong ba ka jingwan tuid jong ki briew kiba nabar ka long kaba “shisha bad kaba dang ïai bteng.”
Kane ka jingkren jong u ka long hadien ka jingkren jong u Director General ka Assam Rifles u Lt. Gen. Vikas Lakhera, uba la ong ha ka sngi Balang ha ka prokram ba la long ha Manipur University ha kaba ki shipai ki la ïohlum jingkheiñ ba don 42,000 ngut ki briew hangne naduh ka 31 tarik, Nohprah, 2024.
“Nga ai khublei ïa u Lt. Gen. Vikas Lakhera, AVSM, SM, DG Assam Rifles, uba la pynthikna ba la lum ïa ki Biometrics na ki briew kiba wan rung beaiñ kiba ïaid lyngba ïa u pud u sam jong ka Indo-Myanmar. Ka jingdonkam na ka bynta kane ka long ban leh ïa kaba donkam haba la lap ba don shisha ki briew kiba nabar kiba la rung beaiñ ha ka thaiñ jong ngi,” la ong u Singh ha ka jingbuh khubor ha ka rynsan X.
