Shillong, Nailar 22:
Ka Myntri ka Sorkar Jylla kaba dei ka MLA na Laitumkhrah Constituency, ka Dr. Mazel Ampareen Lyngdoh ka la ong ba ka khmih lynti ba kan sa ïohi noh ïa ka shnong Laitumkhrah ba kan kylla long noh kum ka Khyndailad.
Ïa kine ki kyntien ka Myntri ka la kren ha kaba ïadei bad ka jingthmu pynkynriah ka Sorkar Jylla ïa ki nongshong die madan ha Laitumkhrah kumba la leh dang shen ïa kiba shongdie madan ha Khyndailad ïa kaba la pynkynriah sha ka Parking Lot jong ka MUDA Complex.
Haba kren sha ki lad pathai khubor haka Sngi Thohdieng ka 22 Tarik Nailar, 2025, ka Dr. Ampareen ka la ong ba kam dei ba ka kwah ban tuh noh ïa ka kamai kajih jong ki nongdie jingdie ha madan hynrei ka dei namar ba hap ban leh ïa kaei kaba donkam.
“Ngam kwah ban hehñia bad ki nongshong die madan bad ngam don eiei ban ong mynta hynrei ngi donkam ban weng, ki paidbah ki phaikhmat sha ka Sorkar ba kan leh eiei haba ïadei bad kane ka jingeh”, ong ka Myntri.
“Ngi ïadei bad ka jingim briew, bad kumta, ka Sorkar kan ïakynduh ïa kane ka mat da ka jingsngewrit kaba khraw tam,” kala ong shuh shuh.
Ka la ong ba ka jingkren jong u Myntri ka Tnat ki kam jngoh kai pyrthei ka Jylla, u Bah Paul Lyngdoh ka long kaba dei, kata ban pynkynriah noh sa ïa kiba shongdie jingdie harud lynti ha Laitumkhrah da kaba bynrap ba ka Sorkar ka pyrkhat naka bynta ka jingmyntoi kaba khraw jong kiba babun balang.
Shuh-shuh, ka la ong ruh ba ka jingpyrshah ïa ka Sorkar ka don beit hynrei ïa kaei ba ka Sorkar ka la thmu ym lah ban pynsangeh.
Kala ong ruh ba ka Sorkar kam lah ban leh ïa kane marwei hynrei ka donkam ka jingïatreilang bad ki paidbah da kaba ong ba ka Dorbar Shnong ka la trei laka jong ka kam bad ka la pynkhreh naka bynta kane ka jingthmu ban pynkynriah ïa ki nongshong die madan na Laitumkhrah.
“Ka Sorkar ka hap ban peit bniah bha ïa kane hashwa ba kan leh bad ka hap ban ïaid katkum ka Aiñ. Ngi hap ban pule bniah shwa ïa ka jinglong jingman”, ka la ong.
Hadien ka jingjop jong ka jingpynkynriah ïa ki nongdie madan na Khyndailad, ka Sorkar mynta ka la buh ka jingkular ban pynjlan ïa kane ka jingpynkynriah sa sha ki thaiñ jong ka Laitumkhrah, Civil Hospital, bad ki thaiñ Motphran hapoh u bnai Naiwieng mynta u snem.
