Shillong, Nailar 22:
Ka Deputy Food Commissioner jong ka Food Safety Enforcement, ka Kong DBS Mukhim haka jingïai bteng khlem shongthait ka la leit sha kylleng ki bynta jong ka Sor Shillong ban peit bad khmih dalade ïa ka jinglong jingman ka khuid ka suba jong ki dukan bam bad dukan die mar die mata kiba don ha kylleng ki jaka ba ki dei ban long kiba leh khuid leh suba khnang ba kan nym don kano kano ka jingktah ïa ka koit ka khiah jong ki paidbah kiba thied bad bam ïa ki jingbam ba die ha kine ki dukan.
Kane ka jingleit jong ka Kong Mukhim sha kylleng ki jaka jong ka nongbah Shillong, ka la lah ban pynkylla dur ïa kiba bun ki ïew ki hat bad ki dukan bam ha kaba la lah ban wanrah ïa ka jingleh khuid bad ka jingitynnad kaba ki paidbah ruh kin sngewhun ka mynsiem lada ki leit ban bam lane lada ki leit thied jingthied na kitei ki dukan khlem jingartatien.
Naka liang ka Kong Mukhim ha kane ka sien kaba mynta kala leit sha ki bynta jong ka Jail Road kaba long kum ka jaka ïew ban khmih ïa ka jinglong jingman ka khuid ka suba ha kane ka jaka.
Haka jingsakhi jong ka ïa ka jingjaboh katei ka jaka, naka liang ka Kong Mukhim kala phah kyrshut bad phah pynkhuid ha ki trai dukan ïa ki dukan jong ki kiba la satah da ki jaboh jabaiñ kaba long kum shibynta ka jingkhuid jingsuba ym tang ïa ki nongwan thied nongwan pet hynrei kan wanrah jingshngaiñ ruh wat ïa ki trai kiba shong die jingdie ha kitei ki dukan.
